ओईसीडीने व्यक्त केला अंदाज : आर्थिक वर्ष 2024 मध्ये जीडीपी वाढीचा दर 6.3 टक्के राहण्याचे संकेत
वृत्तसंस्था /नवी दिल्ली
ऑर्गनायझेशन फॉर इकॉनॉमिक को-ऑपरेशन अँड डेव्हलपमेंट (ओईसीडी) ने 2024 या आर्थिक वर्षासाठी भारताच्या जीडीपी वाढीचा अंदाज वाढवला आहे. ओईसीडीने पूर्वी सकल देशांतर्गत उत्पादन (जीडीपी) 6 टक्क्यांनी वाढेल असा अंदाज व्यक्त केला होता, परंतु आता तो अंदाज बदलत 6.3 टक्के राहणार असल्याचे संकेत व्यक्त केले आहेत. जागतिक अर्थव्यवस्था मंद गतीच्या प्रवासात असताना ओईसीडीने म्हटले आहे की, भारत जी-20 च्या उदयोन्मुख बाजार अर्थव्यवस्थांपैकी एक आहे, ज्याने विकासाच्या दृष्टीने सकारात्मक वाढ पाहिली आहे आणि अनुकूल हवामानामुळे कृषी क्षेत्रातील ही वाढ झाली आहे. तथापि, अहवालात म्हटले आहे की 2023 मध्ये जागतिक अर्थव्यवस्था 3 टक्क्यांनी वाढण्याची अपेक्षा आहे, जी 2024 मध्ये 2.7 टक्क्यांपर्यंत कमी होईल.
‘चीनमध्ये अपेक्षेपेक्षा कमकुवत आर्थिक पुनर्प्राप्ती असूनही, 2023-24 मध्ये आशियाने जागतिक वाढीचा असमान वाटा कायम ठेवण्याची अपेक्षा आहे.’ तथापि, ओईसीडीने भारताचा महागाई दर जूनमध्ये 4.8 टक्क्यांच्या आधीच्या अंदाजावरून 5.3 टक्के केला आहे. अहवालात म्हटले आहे की 2023 च्या पहिल्या सहामाहीत, अन्न आणि उर्जेच्या किमतीत घट झाल्यामुळे अनेक देशांमध्ये महागाई कमी होत राहिली. एक महत्त्वाचा धोका हा आहे की चलनवाढ अपेक्षेपेक्षा अधिक स्थिर राहू शकते, याचा अर्थ व्याजदर आणखी वाढवण्याची गरज नाही, परंतु दीर्घ कालावधीसाठी उच्च राहील, असे अहवालात म्हटले आहे. भारत, इंडोनेशिया, मेक्सिको आणि दक्षिण आफ्रिकेसह अनेक प्रमुख अर्थव्यवस्थांमध्ये पुढील वर्षी काही धोरणात शिथिलता आणण्यास वाव असल्याचे अहवालात म्हटले आहे. ओईसीडीने देशांना सल्ला दिला आहे की आर्थिक सुरक्षेबद्दलच्या चिंतेने सरकारांना व्यापारातील अडथळे कमी करण्याच्या संधींचा फायदा घेण्यापासून प्रतिबंधित करू नये असेही स्पष्ट केले आहे.
