मनपाची आज स्मार्ट सिटी कामांबाबत बैठक
प्रतिनिधी /पणजी
पणजीत सुरू असलेल्या स्मार्ट सिटीच्या कामामुळे नागरिकांना त्रास सहन करावा लागत आहे. नुकतीच संबंधित खात्यांचे प्रमुख आणि उत्तर गोवा जिल्हाधिकाऱयांसोबत बैठक झाली. या बैठकीत 31 मार्चपर्यंत सर्व स्मार्ट सिटीची कामे पूर्ण करण्यात येणार असल्याचे आश्वासन देण्यात आले आहे. याशिवाय स्मार्ट सिटीची कामे वेळेत कशाप्रकारे पूर्ण करता येतील याबद्दल आखणी करण्यासाठी आज बुधवार दि. 7 रोजी स्मार्ट सिटीचे कार्यकारी अधिकारी आणि पोलिस खात्यासोबत बैठक होणार आहे, अशी माहिती पणजीचे महापौर रोहित मोन्सेरात यांनी पणजीत आयोजित केलेल्या पत्रकार परिषदेत दिली.
दि. 11 रोजी पणजीत भरणारी फेरी पंतप्रधान नरेंद्र मोदी यांच्या गोवा भेटीमुळे काही दिवस पुढे ढकलण्यात येणार आहे. पंतप्रधान नरेंद्र मोदी यांच्या गोवा भेटीच्या चार दिवसानंतर पणजीत फेस्ताचे आयोजन करण्यात येईल. पणजीची फेरी ही रद्द करण्यात आलेली नाही. पणजी चर्चची पारंपारिक दुकाने असतील. परंतु पूर्ण फेरी 12 किंवा 13 रोजी चार दिवसांकरिता भरण्यात येईल. चर्च स्क्वेअर याठिकाणी चर्चची दुकाने थाटण्यात येतील.