चॉकलेट-चिप्समधून दिले होते गुंगीचे औषध
बेळगाव : चॉकलेट व चिप्समधून गुंगीचे औषध देऊन मध्यप्रदेशमधील आठ रेल्वे प्रवाशांना लुटणाऱ्या त्रिकुटाला मडगाव येथे अटक करण्यात आली आहे. रेल्वे सुरक्षा दलाने ही कारवाई केली असून ते सर्व जण बिहारमधील आहेत. मोहम्मद सरताज (वय 29) रा. बुद्धीकाशीबारी, चंदनकुमार (वय 23) रा. जगदाळ, दाराकुमार (वय 29) रा. जगदाळ अशी त्यांची नावे आहेत. मडगाव रेल्वेस्थानकावर गुन्हे करण्याच्या प्रयत्नात असताना रेल्वे सुरक्षा दलाच्या अधिकाऱ्यांनी त्यांना अटक केली. सीसीटीव्ही फुटेजवरून ही कारवाई करण्यात आली. 11 सप्टेंबर रोजी वास्को-हजरत निजामुद्दिन एक्स्प्रेसमधून प्रवास करणाऱ्या मध्यप्रदेशमधील आठ तरुणांना गुंगीचे औषध देऊन त्यांच्याजवळून 7 मोबाईल संच व 25 हजार रुपये रोख रक्कम असा लाखाचा ऐवज पळविण्यात आला होता. बेळगाव रेल्वे पोलीस स्थानकात या घटनेची नोंद झाली होती. हद्दीच्या आधारावर हे प्रकरण गोवा रेल्वे पोलिसांकडे वर्ग करण्यात आले आहे.
