ऑनलाईन टीम / अबू धाबी :
संयुक्त अरब अमिरातीने ‘होप मार्स मिशन’ या मंगळ मोहिमेचे यशस्वी प्रक्षेपण केले. युएईने जपानमधील तानेगाशिमा येथील लाँच पॅडवरुन आज सकाळी 6 वाजून 58 मिनिटांनी हे प्रक्षेपण केले.
हवामान अभ्यासासाठी मंगळावर यान सोडणारा संयुक्त अरब अमिराती हा पहिलाच मुस्लिम देश ठरला आहे. या यानाला मंगळापर्यंत पोहचण्यासाठी सात महिन्यांचा कालावधी लागणार आहे. 1.3 टन वजनाचे हे यान 50 कोटी किमीचे अंतर पार करणार आहे. फेब्रुवारी 2021 मध्ये हे यान मंगळाच्या कक्षेत प्रवेश करेल.
मंगळावरील हवामान, वातावरणातील बदल, मंगळावरील पाण्याचा अंश आणि मातीचाही या उपग्रहामार्फत अभ्यास केला जाणार आहे. आतापर्यंतच्या काळात मंगळाच्या रचनेमध्ये कसा बदल झाला, याचाही अभ्यास हे यान करेल. हे यान म्हणजे उमेद आणि मानवतेचे प्रतिक असल्याचे युएईने म्हटले आहे.