क्रिकेटप्रेमींची तुफान गर्दी
► पुणे / प्रतिनिधी
आगामी वर्ल्ड कप स्पर्धेच्या पार्श्वभूमीवर विश्वचषकाची अभूतपूर्व मिरवणूक पुण्यातून मंगळवारी काढण्यात आली. या मिरवणुकीत क्रिकेटपटू, क्रिकेटप्रेमींनी मोठ्या संख्येने भाग घेतला. करंडकासोबत फोटो काढण्याचा आनंदही पुणेकरांनी या वेळी घेतला.
येत्या 5 ऑक्टोबरपासून भारतात विश्वकरंडक क्रिकेट स्पर्धेला सुऊवात होत आहे. या पार्श्वभूमीवर पुण्यात विश्वचषकाची मिरवणूक मोठ्या थाटात काढण्यात आली. तत्पूर्वी एमसीएच्या आंतरराष्ट्रीय क्रिकेट स्टेडियमवर संघटनेचे सर्व पदाधिकारी, आरएमडी ग्रुप, चिंचवड या शाळेचे विद्यार्थी, महाराष्ट्राचे 19 वर्षाखालील संघ (मुले व मुली), महाराष्ट्राच्या खेळाडू तेजल हसबनीस, किरण नवगिरे यांच्या उपस्थितीत विश्वचषकाचे अनावरण करण्यात आले. त्यानंतर एमसीएचे अध्यक्ष रोहित पवार यांच्या उपस्थितीत मिरवणुकीची सुऊवात करण्यात आली.
पुण्यातील जे. डब्लू. मेरीएट हॉटेलपासून सेनापती बापट रस्ता, बीएमसीसी रस्ता, फर्ग्युसन कॉलेज रस्ता ते कृषी महाविद्यालय अशी ही मिरवणूक पार पडली. या मिरवणुकीस चाहत्यांचा उत्स्फूर्त प्रतिसाद मिळाला. विविध ढोल ताशा पथकांचे वादन, दुचाकी स्वारांचा सहभाग यामुळे मिरवणुकीत रंग भरले. रस्त्याच्या दुतर्फा असलेल्या चाहत्यांनी ‘जितेगा भाई जितेगा, इंडिया जितेगा’, ‘वंदे मातरम्’, ‘गणपती बाप्पा मोरया’च्या घोषणा दिल्या. कृषी महाविद्यालय येथे एमसीए अध्यक्ष रोहित पवार यांनी उपस्थित चाहत्यांचे आभार मानले व विश्वचषक चाहत्यांना पाहण्यासाठी खुला केला. माजी कर्णधार चंदू बोर्डे, महाराष्ट्राचा विश्वचषक खेळलेला खेळाडू केदार जाधव तसेच आजी व माजी खेळाडू जोशाने या रॅलीत सहभागी झाले.
दरम्यान, हा करंडक चाहत्यांचा आहे, महाराष्ट्राच्या जनतेचा आहे. त्यामुळे तो बघण्याची संधी सर्वांना मिळावी, यासाठी ही मिरवणूक काढण्यात आल्याचे महाराष्ट्र क्रिकेट अससिएशनचे अध्यक्ष रोहित पवार यांनी पत्रकारांशी बोलताना सांगितले. एमसीए ही एकमेव राज्य संघटना आहे, ज्यांनी अशा प्रकारची भव्य मिरवणूक आयोजित केली. इतर कुठल्याही राज्य संघटनांनी अशा प्रकारची रॅली आयोजित केलेली नाही. या रॅलीद्वारे चाहत्यांना मूळ विश्वचषक कसा असतो, याचे याची देही याची डोळा दर्शन घेता यावे, तसेच करंडकासोबत फोटो काढायची संधी मिळावी, या उद्देशाने रॅलीचे आयोजन करण्यात आल्याचेही पवार यांनी सांगितले.
वर्ल्ड कपसाठी स्टेडियममध्ये सुधारणा : रोहित पवार
वर्ल्ड कपच्या अनुषंगाने स्टेडियममध्ये काही सुधारणा करण्यात आल्या आहेत. प्रेक्षकांसाठी आछादित स्टँड, पार्किंग व्यवस्था व एकंदरीत सामना बघण्याचा चांगला अनुभव घेता येणार आहे. आपण एमसीए आतरराष्ट्रीय स्टेडियम पूर्णत: हरित करण्याच्या मार्गावर आहोत, असेही त्यांनी नमूद केले.
गहुंजे मैदानावर वर्ल्ड कपचे पाच सामने
एमसीएच्या गहुंजे येथील आतरराष्ट्रीय स्टेडियममध्ये विश्वचषकाचे पाच सामने होणार आहेत. यात भारत विऊद्ध बांग्लादेश यांच्यातील 19 ऑक्टोबरच्या सामन्याचादेखील समावेश आहे. दरम्यान, पत्रकार परिषदेस संघटनेचे सचिव शुभेंद्र भांडारकर, सर्वोच्च परिषदेचे सदस्य सुहास पटवर्धन, सुनील मुथा, सुशील शेवाळे, अॅड. अजय देशमुख, रणजीत खिरिड, विनायक द्रविड, कमलेश पिसाळ, राजू काणे, सचिन मुळ्यो, संतोष बोबडे, संजय बजाज, केशव वझे व कल्पना तापकीर, एमसीएचे सीओओ अजिंक्मय जोशी आदी मान्यवर उपस्थित होते.
