ऑनलाईन टीम / जिनिव्हा :
आशिया खंडातील सर्वात मोठी झोपडपट्टी असलेल्या धारावी झोपडपट्टीत कोरोना नियंत्रणात आला आहे. जागतिक आरोग्य संघटनेचे प्रमुख टेड्रोस एडहानोम गेब्रेयेसुस यांनी याची दखल घेत मुंबईतील धारावी मॉडेलचे कौतुक केले आहे.
जिनिव्हामध्ये एका आयोजित पत्रकार परिषदेत बोलताना टेड्रोस एडहानोम गेब्रेयेसुस यांनी धारावीचे कौतुक केले. ते म्हणाले, धारावी हा तब्बल 2.5 चौरस किमी पसरलेला जवळपास 6.5 लाख दाट लोकवस्ती असलेला भाग आहे. या झोपडपट्टीत कोरोनाचे रुग्ण आढळल्याने प्रशासनाची डोकेदुखी वाढली होती.
मात्र, योग्य उपाययोजना राबविल्याने हा भाग अत्यंत गंभीर परिस्थितीतून सावरला आहे. कोरोना चाचणी करणे, रुग्णांचा शोध घेऊन त्याच्या संसर्गाची साखळी तोडणे शक्य आहे, हेच यातून दिसून येते. इटली, स्पेन आणि दक्षिण कोरियानेही कोरोनावर काही प्रमाणात नियंत्रण मिळवले आहे.