जुने गोवे / वार्ताहर : कुंभारजुवे मतदारसंघाचे आमदार राजेश फळदेसाई यांच्या भाजप प्रवेशाबद्दल कुंभारजुवे मतदारसंघातील कार्यकर्ते, मतदार व युवावर्गाकडून उत्स्फूर्त स्वागत करण्यात आले आहे. जुने गोवे येथील कार्यालयात आमदारांच्या भाजप प्रवेशाबद्दल त्यांचे स्वागत व अभिनंदन करण्यासाठी मोठय़ा संख्येने कार्यकर्ते व मतदार यांनी उपस्थिती लावली होती. कुंभारजुवे मतदारसंघाच्या चौफेर विकासासाठी तसेच मतदारसंघातील युवा बेरोजगारांना रोजगार मिळवून देण्यासाठी मतदार व कार्यकर्ते यांच्या आग्रहाखातरच आपण भाजप प्रवेश केला असून त्यासाठी मी वचनबद्ध आहे, अशी प्रतिक्रिया आमदार राजेश फळदेसाई यांनी व्यक्त केली आहे.
