ऑनलाईन टीम / मुंबई :
माजी पोलीस अधिकारी व एन्काउंटर स्पेशालिस्ट प्रदीप शर्मा यांना राष्ट्रीय तपास यंत्रणेने (NIA) अटक केली आहे. अँटिलिया स्फोटक प्रकरण व मनसुख हिरण हत्याप्रकरणात एनआयएने आज पहाटे सहापासून शर्मा यांच्या घरावर धाड टाकली होती. त्यांची एनआयएच्या अधिकाऱ्यांकडून कसून चौकशी करण्यात येत होती. चौकशी पूर्ण झाल्यानंतर अखेर प्रदीप शर्मा यांना एनआयएकडून अटक करण्यात आले आहे.
प्रदीप शर्मा यांच्या घराची एनआयएकडून सकाळपासून झडती घेण्यात येत होती. त्यानंतर आज दुपारी शर्मा यांना एनआयएने अटक केली आहे. अँटिलिया स्फोटके आणि मनसुख हिरण हत्या प्रकरणात सहभाग आणि पुरावे नष्ट केल्याचा आरोपांखाली प्रदीप शर्मा यांना अटक करण्यात आल्याची माहिती समोर येत आहे. प्रदीप शर्मांना कोर्टात हजर करुन एनआयए कोठडीची मागणी करणार आहे.
दरम्यान, उद्योगपती मुकेश अंबानी यांच्या दक्षिण मुंबईतील अँटिलिया निवास्थानाजवळ सुमारे अडीच किलो जिलेटीन ठेवलेली स्कॉर्पिओ कार सापडली होती. या प्रकरणात एनआयएने सहायक पोलिस निरीक्षक सचिन वाझे यांना अटक केली. स्कॉर्पिओचे मालक असलेल्या मनसुख हिरन यांच्या मृत्यूप्रकरणाचा तपासही एनआयएकडे असून या दोन्ही प्रकरणात वाझेयांच्यासंपर्कात प्रदीप शर्मा होते, असे सूत्रांकडून समजले आहे.
अँटिलिया स्फोटके आणि मनसुख हिरेन प्रकरणातील ही 8 वी अटक असून ठाण्यातील आणखी एक अधिकारी एनआयएच्या रडार आहे. या अधिकाऱ्याला देखील लवकरच चौकशीसाठी बोलवण्यात येणार असल्याची माहिती समोर येत आहे.
