वृत्तसंस्था/ मेलबर्न
यावर्षी भारतात टी-20 विश्वचषक स्पर्धा होत असल्याने त्याच्या तयारीचा एक भाग म्हणून ऑस्ट्रेलिया संघ टी-20 मालिका खेळण्यासाठी बांगलादेशचा दौरा करण्याची शक्यता आहे. हा दौरा नियोजनाप्रमाणे झाला तर 2017 नंतर त्यांचा हा बांगलादेशचा पहिलाच दौरा असेल.
याआधी विश्व कसोटी चॅम्पियनशिपचा एक भाग म्हणून ऑस्ट्रेलियाचा संघ बांगलादेश दौऱयावर कसोटी मालिका खेळण्यासाठी जाणार होता. पण या नियोजनात आता बदल करण्यात आला असल्याचे वृत्त एका क्रीडा वेबसाईटने दिले आहे. एफटीपीच्या कार्यक्रमानुसार, टी-20 विश्वचषकाआधी इंग्लंड संघ बांगलादेशचा दौरा करणार आहे. त्यामुळे इंग्लंड, बांगलादेश व ऑस्ट्रेलिया या तीन संघांत तिरंगी मालिका खेळविली जाण्याची शक्यता वर्तविण्यात येत आहे. या छोटय़ा दौऱयासाठी क्रिकेट ऑस्ट्रेलिया व बीसीबी यांच्यात बोलणी सुरू आहेत. अलीकडेच ऑस्ट्रेलियाने कोरोना महामारीच्या कारणास्तव द.आफ्रिका दौरा लांबणीवर टाकण्याचा निर्णय घेतला होता. ऑस्ट्रेलिया संघ आता न्यूझीलंडविरुद्ध टी-20 मालिका खेळताना दिसणार आहे.