बेंगळूर/प्रतिनिधी
माजी राज्यमंत्री रमेश जारकिहोळी यांची लैंगिक सीडी व्हायरल झाल्यांनतर राज्यात एकच खळबळ उडाली. जारकिहोळी यांना यासाठी मंत्रिपदाचा राजीनामाही द्यावा लागला. दरम्यान या प्रकरणाच्या चौकशीसाठी विशेष तपास पथकही नेमले. जारकिहोळी यांनी आपली बदनामी आणि राजकारण संपविण्याचा प्रयत्न असल्याचा आरोप केला आहे. यावेळी जारकिहोळी यांनी या प्रकरणाची कसून चौकशी करण्याची मागणी केली. दरम्यान तपासामध्ये सीडी तयार करणे आणि त्याचे वितरण करण्यात सातपेक्षा अधिक लोकांचा हात आहे. अशी माहिती समोर आल्याचे पोलीस सूत्रांनी सांगितले आहे.
सूत्रांनी दिलेल्या माहितीनुसार, सीडी सार्वजनिकरित्या जाहीर होण्याच्या एक दिवस आधी या समूहाची बेंगळूरमध्ये संयुक्त बैठक झाली, असे तपासात उघड झाले आहे.
व्हिडिओमध्ये दिसत असलेल्या महिलेच्या पुरुष मित्रासह, सीडीबद्दल माहिती नसलेल्या अनेक लोकांची एसआयटीने चौकशी केली आहे. सूत्रांनी दिलेल्या माहितीनुसार, ही महिला सोमवारीही पोलिसांसमोर हजर झाली नव्हती आणि या प्रकरणातील अन्य दोन महत्त्वाच्या व्यक्ती फरार आहे.
जारकिहोळी यांनी सीडी व्हायरल झाल्यांनतर ३ मार्च रोजी राजीनामा दिला होता. युवतीशी झालेल्या सहमतीच्या संबंधातील रेकॉर्डिंग माध्यम वाहिन्यांकडे आणि इंटरनेटवर २ मार्चला अज्ञात व्यक्तींनी सार्वजनिक ठिकाणी आणल्यानंतर हे काम चालू झाले.
व्हिडिओमधील महिलेचा पुरुष मित्र – तो एक महत्वाकांक्षी अभिनेता असल्याचे म्हटले जात आहे. याविषयी दोन जवळच्या साथीदारांची पोलिसांनी गेल्या काही दिवसांत चौकशी केली होती.