प्रतिनिधी / कुर्डुवाडी
विवाहाला अवघे २२ महिने झाले नाही तोच पती व सासरा यांनी विवाहीतेला माहेरी जाऊ नये व माहेरच्या लोकांशी संपर्क करु नये यासाठी त्रास देण्यास सुरुवात केली. सततच्या त्रासाला कंटाळून २२ वर्षीय विवाहीतेने राजाभाऊ पाटील यांच्या विहीरीत उडी मारून आत्महत्या केली.
ही घटना कुर्डू ता. माढा येथे रविवार दि.१३ रोजी सायं ७.२० मि.पूर्वी घडली. याबाबत बाबासाहेब भालचंद्र पाटील रा. अरण ता.माढा यांच्या फिर्यादीवरुन कुर्डुवाडी पोलिसांत मयत विवाहीतेचे पती श्रीकांत राजाभाऊ पाटील व सासरे राजाभाऊ पाटील रा.कुर्डू यंच्याविरोधात गुन्हा दाखल झाला आहे.स्वाती श्रीकांत पाटील वय २२ असे आत्महत्या केलेल्या विवाहितेचे नाव आहे. घटनास्थळाला उपविभागीय पोलिस अधिकारी विशाल हिरे व सहा.पो.निरीक्षक विक्रांत बोधे यांनी भेट दिली.सदर आरोपींना काल सायंकाळी पोलिसांनी अटक केली असून पुढील तपास पोलिस उप निरीक्षक किरण भालेकर हे करीत आहेत.