ऑनलाईन टीम / श्रीनगर :
दक्षिण काश्मीरच्या कुलगाम जिल्ह्यातील हसनपोरा भागात आठ तास चाललेल्या चकमकीत दोन दहशतवाद्यांचा खात्मा करण्यात सुरक्षा दलाला यश आले. या दहशतवाद्यांची ओळख अद्याप पटली नाही.
पोलिसांनी दिलेल्या माहितीनुसार, रविवारी हसनपोरा गावात दहशतवादी लपल्याची माहिती सुरक्षा दलांना मिळाली होती. त्यानंतर सुरक्षा दलांनी संयुक्तपणे संध्याकाळी या भागाला वेढा घातला आणि शोध मोहीम सुरू केली. दरम्यान, लपलेल्या दहशतवाद्यांनी सुरक्षा दलांवर गोळीबार सुरू केला. सुरक्षा दलांनीही गोळीबाराला प्रत्युत्तर दिले. खराब हवामान आणि अंधारामुळे गावात येण्या-जाण्यासाठी सर्व मार्ग बंद करण्यात आले होते. दरम्यान, मध्यरात्री एकच्या सुमारास सुरक्षा दलांचा वेढा तोडून पळून जाण्याच्या प्रयत्नात असलेले दोन दहशतवादी गोळीबारात ठार झाले. लोकवस्तीचा भाग असल्याने सुरक्षा दल खबरदारी घेत होते.
या वर्षातील ही आठवी चकमक आहे. नववर्षात आतापर्यंत 13 दहशतवादी ठार झाले आहेत. त्यापैकी बहुतेक जैश-ए-मोहम्मद आणि लष्कर-ए-तैयबाचे सर्वोच्च कमांडर आहेत.