ऑनलाईन टीम / वॉशिंग्टन :
मागील सहा महिन्यांपासून कोरोनाने संपूर्ण जगाला विळखा घातला आहे. दिवसेंदिवस कोरोनाचा वाढता प्रादुर्भाव पाहता हा विषाणू पूर्णपणे नष्ट होणे अशक्य असल्याचे जागतिक आरोग्य संघटनेच्या आपत्कालीन विभागाचे प्रमुख डॉ. माईक रेयान यांनी म्हटले आहे.
रेयान म्हणाले, जगभरात कोरोनाचा प्रादुर्भाव दिवसेंदिवस वाढत आहे. रोज लाखो लोक संक्रमित होत आहेत. तर हजारो लोक मृत्यू पावतात. सध्याची परिस्थिती पाहता हा विषाणू नष्ट होणे अशक्य आहे. त्यामुळे लोकांना कोरोनासोबत जगण्याची सवय करून घ्यावी लागेल.
कोरोना कधी नष्ट होईल, हे आपण सांगू शकत नाही. मात्र, त्यापासून आपण आपला बचाव करू शकतो. कोरोनाला रोखण्यासाठी जगभरातील अनेक देशात लॉकडाऊन सुरू आहे. काही देशात अंशतः लॉकडाऊन आहे. या लॉकडाऊनमुळेच अनेक देशात कोरोना नियंत्रणात आहे, असेही रेयान यांनी म्हटले आहे.