- शासनाकडून चौघांवर होते 22 लाख रुपयांचे बक्षीस
ऑनलाईन टीम / गडचिरोली :
गडचिरोली पोलिसांपुढे चार जहाल नक्षलवाद्यांनी मंगळवारी गडचिरोली पोलिसांसमोर आत्मसमर्पण केले आहे. या चौघांवर अनेक गुन्हे असून शासनाने या चौघांवर एकूण 22 लाख रुपयांचे बक्षीस जाहीर केले होते.
मिळालेल्या माहितीनुसार, आत्मसमर्पित नक्षल्यांमध्ये 3 पुरुष आणि एका महिलेचा समावेश आहे. शासनाने जाहीर केलेली आत्मसमर्पण योजना, वर्षभरात विविध चकमकीत माओवाद्यांचा झालेला खात्मा तसेच हिंसाचाराच्या जीवनाला कंटाळून वरिष्ठ नक्षली नेत्यांसह अनेक जहाल नक्षल्यानी आजपर्यंत आत्मसमर्पण केले आहे. त्याचबरोबर आत्मसमर्पितांचे पोलीस दलाने पुनर्वसन घडवून आणल्यामुळे ही संख्या वाढत आहे.
- आत्मसमर्पण केलेले नक्षलवादी
- दिनेश उर्फ दयाराम गंगर नैताम ( 28 वर्षे) :
हा मूळचा धानोरा तालुक्यातील पुळकडो येथील रहिवासी आहे. डिसेंबर 2006 मध्ये टिपागड दलमच्या सदस्य पदावर भरती होऊन फेब्रुवारी 2007 पासून टिपागड सदस्य म्हणून कार्यरत होता. त्यांनतर दलममध्ये अनेक पदे सांभाळत आक्टोबर 2020 पर्यंत भामरागड एरिया कमांडर पदावर कार्यरत होता. त्याच्यावर चकमकीचे 11 गुन्हे , खुनाचे 6 गुन्हे, जाळपोळीचे 3 गुन्हे दाखल असून शासनाने त्याचेवर एकूण 8 लाख रूपयाचे बक्षीस जाहीर केले होते.
- नकुल उर्फ सुखालुराम डुमा मडावी (35 वर्षे) :
हा छत्तीसगड मधील रहिवासी असून सप्टेंबर 2002 मध्ये टिपागड दलम मध्ये सदस्य म्हणून भरती झाला. त्यानंतर विविध पदावर होता. त्याच्यावर चकमकीचे 09 गुन्हे, 4 खूनाचे, जाळपोळीचे 5 गुन्हे, 09 भूसुरूंग स्फोटाचे गुन्हे दाखल असून, त्याच्यावर शासनाने 8 लाख रूपयाचे बक्षीस जाहीर केले होते.
- निला रूषी कुमरे (34 वर्षे) :
ही नक्षल महिला मूळची एटापल्ली तालुक्यातील रहिवासी असून नोव्हेंबर 2005 ला कसनसूर दलम मध्ये सदस्य रुपात भरती झाली. नकुल उर्फ सुखालुराम डुमा मडावी प्लाटुन क्र.03 सेक्शन क.01 चा कमांडर याचे सोबल लग्न करून ते दोघेही कसनसूर दलममध्ये कार्यरत होते. निलावर चकमकीचे 3 गुन्हे, 3 खूनाचे, जाळपोळीचे 4 गुन्हे दाखल असून, तिच्यावर शासनाने 2 लाख रूपयाचे बक्षीस जाहीर केले होते.
- शरद उर्फ रमेश उर्फ गोविंदा सामजी आतला (26 वर्षे) :
हा धनोरा तालुक्यातील रहिवासी असून जानेवारी 2011 मध्ये चातगाव दलम मध्ये विविध पदावर आजवर कार्यरत होता. त्याचेवर चकमकीचे 6 गुन्हे, 2 खुनाचे गुन्हे दाखल असून, त्याच्यावर शासनाने 4 लाख रूपयाचे बक्षीस जाहीर केले होते.
गडचिरोली पोलीस दलाने अतिशय प्रभावीपणे नक्षलविरोधी अभियान राबविल्यामुळे गेल्या 2 वर्षात आजपर्यंत एकूण 37 माओवादयांनी आत्मसमर्पण केले असून यात 4 डिव्हीसी, 2 दलम कमांडर, 2 दलम उपकमांडर, 28 सदस्य, 1 जनमिलीशिया यांचा समावेश आहे. विकास कामांना आडकाठी करणाऱ्या नक्षलवाद्यांवर पोलीस दल सक्षमपणे कारवाई करण्यास तत्पर असल्याचे पोलीस अधीक्षक अंकित गोयल यांनी स्पष्ट केले आहे.
