देवराष्ट्रे / वार्ताहर
मोहित्यांचे वडगाव ता.कडेगाव येथील संतोष शंकर शिंदे (वय ३५) याच्या डोक्यात फरशी घालून त्याच्या वडिलांनी त्याला जखमी केले होते. दरम्यान उपचार सुरू असतानाच बुधवारी पहाटे 2 वाजता संतोष शिंदे यांचा मृत्यू झाला. याप्रकरणी आरोपी शंकर रामचंद्र शिंदेवर खुनाचा गुन्हा दाखल झाला आहे. याबाबत पोलिसांकडून मिळालेली अधिक माहिती अशी संतोष शिंदे हा वारंवार त्याचे वडील शंकर शिंदे यांच्याकडे घर व शेत जमिनीची वाटणी मागत होता वाटणीवरून त्यांच्यात दररोज वाद होत होते. रविवारी रात्री ९ वाजता संतोष दारु पिऊन आरोपी शंकर शिंदे यांच्या घरासमोर आला व घर,शेत जमिनीच्या वाटणी देण्याच्या कारणावरून आई वडिलांना शिवीगाळ करू लागला. त्यावेळी वडील शंकर व मुलगा संतोष यांच्यात वादावादी झाली.
यावेळी संतोष शिंदे याने वडिलांना जीवे मारण्याची धमकी दिली यामुळे रागाच्या भरात वडील शंकर यांनी संतोषच्या डोक्यात फरशी घातली यामध्ये संतोष गंभीर जखमी झाला त्याला तात्काळ सांगली येथील शासकीय रुग्णालयात दाखल करण्यात आले होते त्याची प्रकृती चिंताजनक होती. उपचार सुरु असतानाच बुधवारी पहाटे त्यांचा मृत्यू झाला. आरोपी शंकर शिंदे हा सध्या न्यायालयीन कोठडीत आहे. तपास सहाय्यक पोलिस निरीक्षक संतोष गोसावी करीत आहेत.