ऑनलाईन टीम / मुंबई :
राष्ट्रवादी काँग्रेसचे सर्वेसर्वा शरद पवार यांना युपीएचे अध्यक्षपद दिल्याची चर्चा सध्या जोरदार चालू आहे. राहुल गांधी यांनी जबाबदारी घेण्यास नकार दिल्याने शरद पवार यांचे नाव पुढे असल्याची चर्चा आहे. दरम्यान, शरद पवार युपीएचे अध्यक्ष झाल्यास काय भूमिका असेल यावर शिवसेना खासदार संजय राऊत यांनी प्रतिक्रिया दिली आहे.
ते म्हणाले, जर शरद पवार युपीएचे अध्यक्ष झाले तर आमच्यासाठी आनंदाची बाब आहे. पण मला अशी कोणतीही शक्यता दिसत नाही. शरद पवारांनीही हे वृत्त नाकारले आहे. शरद पवार महाराष्ट्राचे, देशाचे खूप मोठे नेते आहेत. त्यांच्या नेतृत्वात आम्ही सगळे काम करत आहोत. पण जेव्हा युपीए अध्यक्षपदाबाबत आपण बोलत आहोत तेव्हा तसा कोणाताही प्रस्ताव अद्याप आलेला नाही. ही गोष्ट जर शरद पवारांनी स्वत: सांगितली असेल तर त्यावर चर्चा करणे योग्य नसल्याचे त्यांनी सांगितले.
पुढे ते म्हणाले, आम्ही तर नेहमीच हितचिंतक राहिलो आहोत. जर असा कोणता प्रस्ताव आला तर त्याचे नक्कीच समर्थन करु.
सध्या राष्ट्रीय राजकारणात काँग्रेस कमकुवत आहे. अशा परिस्थितीत आपल्याला एकत्र येऊन युपीएला मजबूत करावे लागेल. ज्याप्रकारे महाराष्ट्रात महाविकास आघाडी झाली त्याच प्रकारे आघाडी होऊ शकते का? त्याचं नेतृत्व कोण करणार? या सगळ्या मोठ्या गोष्टी आहेत. त्यावरही निर्णय होतील, असेही राऊत यांनी यावेळी म्हटले.
