सुदैवाने कोणतीही जिवीतहानी नाही : मच्छीमारांना मोठा आर्थिक फटका
प्रतिनिधी / मडगाव
मच्छीमारी बंदी उठविल्यानंतर गोव्यातील मच्छीमारांनी आपल्या यांत्रिकी बोटी घेऊन मासेमारी करण्यास प्रारंभ केला असला तरी सद्या समुद्र खवळलेला असल्याने समुद्रात जाणे कठीण होऊन बसले आहे. त्याही परिस्थितीत धाडस करून समुद्रात मच्छीमारीसाठी गेलेल्या तीन होडय़ा बुडण्याची घटना दक्षिण गोव्यात घडली आहे. या तिन्ही होडय़ावर खलाशी होते, त्यांना वाचविण्यात यश आले आहे. मात्र, मच्छीमारांना लाखो रूपयांचा फटका बसल्याची माहिती बाणावली येथील मच्छीमार पेले फर्नांडिस यांनी दिली.
रविवार, सोमवार व मंगळवार असे सलग तीन दिवस या होडय़ा बुडण्याच्या घटनांची नोंद झालेली आहे. रविवारी वार्का येथे बाणावलीचे मच्छीमार पेले यांची होडी वार्का येथे बुडाली. ही होडी खोल समुद्रात गेली नव्हती. त्यामुळे कुठलाच अनर्थ घडला नाही. या होडीवर 12 खलाशी होते. त्यांनी पोहून समुद्रकिनारा गाठला. मात्र मासेमारीसाठीची जाळी खराब झाली. बुडालेली होडी देखील समुद्रकिनाऱयावर आणण्यात यश आल्याची माहिती पेले यांनी दिली.
सोमवारी कोलवा येथे मासेमारीसाठी समुद्रात गेलेली होडी जोरदार लाटांच्या तडाख्यात उलटी झाल्याने 15 खलाशी पाण्यात पडले. त्या सर्वांना जीवनरक्षकांनी सुखरूप किनाऱयावर आणले. काल मंगळवारी बाणावली येथील एका मच्छीमाराची होडी अशीच समुद्रात बुडाली. ही होडी खोल समुद्रात मच्छीमारी करत असताना ही घटना घडली. या होडीवरसुद्धा 10 खलाशी होते. या सर्वांना ट्रॉलरद्वारे मच्छीमारी करणाऱयांनी मदतीचा हात दिला व सर्वांना सुखरूप समुद्रकिनाऱयावर आणले.
होडय़ा बुडणे हा जीवनाचा एक भाग : पेले
समुद्र खवळेला असल्याने मासेमारीसाठी जाणे धोक्याचे असते. पण, याच काळात मच्छीमारांना चांगली मासळी सापडते. त्यामुळे मच्छीमार सर्व धोका पत्करून समुद्रात जातात. अशावेळी दुर्घटना होत असतात. हाच तर मच्छीमारांच्या जीवनाचा एक भाग बनेला आहे अशी प्रतिक्रिया पेले फर्नांडिस यांनी व्यक्त केली आहे. समुद्र खवळलेला असल्याने समुद्रात जाण्याचे टाळले तर पोटाची खळगी कशी भरावी, असा प्रश्न उपस्थितीत होत असतो. समुद्राच्या लाटाशी दोन हात करणे हा तर नित्याचाच भाग बनलेला असतो, असे पेले म्हणाले.