ऑनलाईन टीम / पाटणा :
बिहारमधील पाटणा जिल्ह्यात शनिवारी एक कार ट्रेनच्या खाली आल्याने चार वर्षाच्या मुलासमवेत एकाच परिवारातील तीन जणांचा मृत्यू झाला.
मिळालेल्या माहितीनुसार, ही घटना पाटणा मधील पुनपुनमध्ये रेल्वे क्रॉसिंग जवळ झाली. पूर्व मध्य रेल्वेचे सीपीआरओ राजेश कुमार यांनी सांगितले की, कार सकाळी 6.35 च्या दरम्यान पोटही आणि नदवां स्टेशन दरम्यान रेल्वे रुळ ओलांडत होती. त्याच वेळी पाटणा – रांची जनशताब्दी विशेष ट्रेनने या कारला धडक दिली.
हा अपघात कार चालकाच्या निष्काळजीपणामुळे झाला आहे असे सांगून ते म्हणाले, या कार चालकाने बेकायदेशीरपणे रेल्वेचे रूळ ओलांडून नियमांचे उल्लंघन केले. ही ट्रेन गया येथे जात असताना हा अपघात घडला.
पुनपुन पोलीस स्टेशनचे एसएचओ कुंदन कुमार सिंह यांनी सांगितले की, मृतांमधील सुजित (वय 32) आणि त्यांची पत्नी नीलिमा (वय 26) यांची ओळख पटली आहे. यांच्या चार वर्षांच्या मुलाचा देखील यामध्ये मृत्यू झाला आहे. पुढे ते म्हणाले, हे कुटुंब पाटणा मधील आनंदपुरी या भागातील रहिवासी होते. दरम्यान, मृतदेह पोस्टमार्टेमसाठी पाठवण्यात आले आहेत.