प्रतिनिधी / कोल्हापूर
शासनाच्या सांस्कृतिक कार्य संचालनालयाच्या वतीने 1 जानेवारी 2022 पासून राज्य नाट्यस्पर्धा सुरू होणार आहेत. या स्पर्धेसाठी 15 ते 30 नोव्हेंबर या कालावधीत हौशी नाट्यसंस्थांनी प्रवेशिका भरायची आहे. 60 व्या हौशी मराठी नाट्यस्पर्धेची प्राथमिक फेरी 1 जानेवारी 2022 पासून राज्यातील विविध स्पर्धा केंद्रांवर आयोजित करण्यात येणार आहे. तसेच 60 व्या राज्य हौशी हिंदी, संगीत व संस्कृत नाट्यस्पर्धाची अंतिम फेरी 1 फेब्रुवारी 2022 पासून एका केंद्रावर आयोजित करण्यात येणार आहे, अशी माहिती सांस्कृतिक कार्य संचालनालयाचे संचालक बिभीषण चवरे यांनी पत्रकाव्दारे जाहीर केली आहे.
नाट्यस्पर्धेकरीता 3 हजार रूपये अनामत रकमेचा धनादेश स्पर्धक संस्थेने पाठवायचा आहे. हा धनादेश संचालक, सांस्कृतिक कार्य, महाराष्ट्र राज्य, मुंबई यांच्या नावे पाठवावा. प्रयोग सादर केल्यानंतर त्याच रकमेचा धनादेश (डीडी) संस्थांना परत केला जाईल. नोंदणीकृत हौशी नाट्यसंस्थांना तसेच गतवर्षी राज्यनाटय स्पर्धेत सहभागी झालेल्या नाट्यसंस्थांना स्पर्धेसाठी विहित नमुन्यातील प्रवेशिका, नियम संचालनालयाच्या www.mahasanskruti.org या वेबसाईटवर नवीन संदेश उपलब्ध होतील. आवश्यक त्या कागदपत्रासह प्रवेशिका 30 नोव्हेंबरपर्यंत सादर करावी. मुंबई, कोकण व नाशिक विभागातील संस्थांनी संचालक, सांस्कृतिक कार्य संचालनालय, जुने सचिवालय, विस्तार भवन, पहिला मजला, महात्मा गांधी मार्ग, मुंबई या पत्त्यावर प्रवेशिका सादर कराव्यात. तसेच पुणे महसूल विभागातील संस्थांनी, सहाय्यक संचालक, सांस्कृतिक कार्य संचालनालय, विभागीय कार्यालय, बंगला क्रमांक 4, विमानतळ रोड, पुणे या पत्त्यावर प्रवेशिका सादर कराव्यात. औरंगाबाद महसूल विभागातील संस्थांनी सहाय्यक संचालक, सांस्कृतिक कार्य संचालनालय, विभागीय कार्यालय, रुम नंबर- 02, एमटीडीसी बिल्डिंग, गोल्डी टॉकीजच्या समोर, स्टेशन रोड, औरंगाबाद या पत्त्यावर प्रवेशिका सादर कराव्यात. नागपूर व अमरावती महसूल विभागातील संस्थांनी सहाय्यक संचालक, सांस्कृतिक कार्य संचालनालय, विभागीय कार्यालय द्वारा अभिरक्षक, मध्यवर्ती संग्रहालय, अस्थायी प्रदर्शन हॉल, तळमजला, सिव्हिल लाईन, नागपूर या पत्त्यावर प्रवेशिका सादर कराव्यात.
विहित मुदतीनंतर प्राप्त होणार्या प्रवेशिका कोणत्याही परिस्थितीत स्विकारल्या जाणार नाहीत. प्रवेशिकेसोबत आवश्यक असणारी कागदपत्रे जोडलेली नसल्यास किंवा संपूर्ण तपशिल भरला नसल्यास प्रवेशिका अपात्र ठरविण्यात येईल. प्रवेशिकेतील त्रुटींच्या संदर्भात कोणताही पत्रव्यवहार केला जाणार नाही, याची सर्व स्पर्धक संस्थांनी नोंद घ्यावी. स्पर्धेसाठी संस्थेची निवड झाल्यानंतर संस्थेने शासनाने निश्चित केलेल्या केंद्रावर व दिलेल्या तारखेस प्रयोग सादर केला नाही, तर त्यांची प्रवेशिकेसोबत भरलेली अनामत रक्कम शासकीय कोषागारात जमा करण्यात येईल. नाट्यस्पर्धेकरीता संस्थांना शासन नियम बंधनकारक राहतील. नियमांचे उल्लंघन केल्यास संस्थेला अपात्र ठरविण्यात येईल.