वृत्तसंस्था / नवी दिल्ली
ऑटोमोबाईल क्षेत्रातील कंपनी रेनॉने आपल्या व्यावसायिक वाहनांच्या विक्रीला प्रारंभ केला असून या अंतर्गत सुव्ह गटातील किगर या गाडीला ग्राहकांचा चांगला प्रतिसाद मिळत असल्याचे दिसून आले आहे. गाडीला पहिल्याच दिवशी 1100 ग्राहकांनी मागणी नोंदविली आहे. हा एक प्रकारचा विक्रमच असल्याचे रेनॉकडून सांगण्यात आले. कंपनीच्या विक्रेत्यांमार्फत सदरच्या गाडीचे बुकींग ग्राहकांना करता येणार आहे. अंदाजे 500 विक्री केंद्रांमार्फत तसेच संकेतस्थळावरून सदरची गाडी बुक करण्याची संधी ग्राहकांना असणार आहे. कंपनीने पहिल्याच दिवशी 1100 किगर वाहनाचे वितरण ग्राहकांना केले आहे. यावरुनच किगरची लोकप्रियता भारतीयांमध्ये सर्वाधिक असल्याचे स्पष्ट होत आहे, असे कंपनीचे व्यवस्थापकीय संचालक व सीईओ व्यंकटराम ममीलपल्ले यांनी सांगितले. याआधी याच गटातील डस्टर या गाडीला ग्राहकांनी खूप पसंदी दर्शविली होती. भारतासह जगभरात या गाडीचे चाहते अधिक असल्याचा कंपनीला अभिमान असल्याचे त्यांनी सांगितले.