हालभांवी येथील निवासी शाळेत 80 खाटांची व्यवस्था
प्रतिनिधी /बेळगाव
कोरोनाची लक्षणे नसणाऱया बाधितांवर उपचार करण्यासाठी स्वतंत्र व्यवस्था करण्यात आली आहे. वंटमुरीजवळील हालभांवी येथे असलेल्या मुरारजी देसाई निवासी शाळेत यासाठी 80 खाटांची व्यवस्था करण्यात आल्याची माहिती जिल्हाधिकारी एम. जी. हिरेमठ यांनी दिली.
गुरुवारी इतर अधिकाऱयांसह जिल्हाधिकाऱयांनी स्वतः या निवासी शाळेला भेट देवून तेथील व्यवस्थेची पाहणी केली. ज्यांचा अहवाल कोरोना पॉझिटिव्ह आला आहे तरीही त्यांच्यात लक्षणे दिसून येत नाहीत अशा रुग्णांवर या निवासी शाळेत उपचार करण्यात येणार आहेत. ज्यांच्यावर अधिक उपचाराची गरज आहे त्यांच्यावर सिव्हिल हॉस्पिटलमध्ये उपचार करण्यात येणार असल्याचे त्यांनी सांगितले.
सिव्हिल हॉस्पिटलमधील विलगीकरण कक्षात दाखल झालेल्या व कोरोनाची लक्षणे नसलेल्या बाधितांना गुरुवारपासूनच या निवासी शाळेत हलविण्याची प्रक्रिया सुरु झाली आहे. यापुढे नव्याने दाखल होणाऱया बाधितांना थेट निवासी शाळेत दाखल करण्यात येणार आहे, असेही जिल्हाधिकाऱयांनी सांगितले.