रोख रकमेसह सोने लंपास : परिसरात घबराट : पोलीस तपास सुरू
वार्ताहर/ अथणी
शिरहट्टी (ता. अथणी) येथे एकाच रात्रीत सहा ठिकाणी घरफोडी झाल्याची घटना बुधवारी रात्री घडली. या घटनेत चोरटय़ांनी रोख 1 लाख 13 हजार रुपयांसह सोनेदेखील लंपास केले आहे. या घटनेने परिसरात घबराट पसरली आहे.
याबाबत समजलेली माहिती अशी की, गोपाल सनदी यांचे घर, राम सनदी यांची पिठाची गिरण, धृव जोशी, कालाप्पा बडगेर, किरणकुमार नंदेश्वर, अशोक उपाध्ये यांचे दुकान, मल्लाप्पा मिशी, सुवर्णा हळीगेले, रफीक मुल्ला आदींचे घर फोडून चोरटय़ांनी तेथील सोन्याच्या दागिन्यांसह रोख रक्कम लंपास केली. घटनास्थळी डीएसपी एस. व्ही. गिरीश, सीपीआय शंकरगौडा बसगौडर, पीएसआय कुमार हडकर यांनी भेट देऊन पंचनामा केला. याबाबत अथणी पोलिसांत गुन्हा नोंद झाला असून पुढील तपास सुरू आहे.