माजी मुख्यमंत्री पृथ्वीराज चव्हाण यांची माहिती
प्रतिनिधी / कराड
कराड विमानतळावर दमानियाच्या वतीने लवकरच प्राइड अकॅडमी स्कूल सुरू करण्यात येणार असल्याची माहिती माजी मुख्यमंत्री पृथ्वीराज चव्हाण व दमानिया एअरवेजचे परवेज दमानिया यांनी पत्रकारांशी बोलताना दिली.
कराड विमानतळ हे गोवा आणि पुणे विमानतळाला मध्यवर्ती आहे. गोवा आणि पुणे विमानतळावर हवाई दलाची वाहतूक वापर मोठ्या प्रमाणात असल्याने तेथे खाजगी विमान वाहतुकीला परवानगी दिली जात नाही. या पार्श्वभूमीवर कराड विमानतळावर दमानिया अकॅडमी सुरुवात करण्याबाबत चाचपणी करण्यात आली. पृथ्वीराज चव्हाण यांनी याबाबत दमानिया एअरवेजला संपूर्ण सहकार्य केले होते. त्यानुसार आज परवेश दमानिया व कंपनीच्या अन्य सहकाऱ्यांनी कराड विमानतळावर एक विमान घेऊन पाहणी केली. कराड विमानतळ हे फ्लाईंग अकॅडमी सुरू करण्यासाठी योग्य ठिकाण आहे. त्यामुळे महाराष्ट्र विमानतळ विकास कंपनीशी बोलून आवश्यक त्या परवानग्या घेऊन ही अकॅडमी लवकरात लवकर सुरू करण्यात येईल. या कामी पृथ्वीराज चव्हाण यांचे महत्त्वाचे सहकार्य मिळत असल्याचे दमानिया यांनी सांगितले.
देशात १० ठिकाणी तर महाराष्ट्रात ३ ठिकाणी हे स्कूल सुरू आहे. या अकादमीमध्ये स्थानिकांसह देशभरातून विद्यार्थी प्रवेश घेतील. विमान चालवण्याचे प्रशिक्षण घेऊन खाजगी विमान कंपन्यांमध्ये त्यांना संधी मिळू शकते. या कोर्सच्या माध्यमातून कराड परिसराच्या आर्थिक विकासालाही चालना मिळणार आहे. त्याचबरोबर प्रगतीचे नवे दालन खुले होत असल्याचे चव्हाण यांनी सांगितले. त्यामुळे आर्थिक पप्रगतीला चालना मिळेल असे त्यांनी यावेळी सांगितले.
