सातारा / प्रतिनिधी :
जमिनीचा व्यवहार व आर्थिक देवाण, घेवाणीच्या कारणातून शुक्रवारी 11 वाजण्याच्या सुमारास एका टोळक्याने संतोष उर्फ विठ्ठल सूळ या 45 वर्षीय इस्टेट एजंटचा खून केला. या घटनेमुळे दिव्यनगरीसह शाहूपुरीत परिसरात खळबळ उडाली असून, या घटनेनंतर आरोपी फरारी झाले आहेत.
शुक्रवारी सकाळी 11 वाजण्याच्या संतोष सूळ रा. आवाडवाडी, आंबेदरे, ता. सातारा हे साताऱ्याकडे येत होते. त्यावेळी दिव्यनगरी परिसरात त्यांचा एकाबरोबर जमीन व्यवहार व आर्थिक देवाण, घेवाणीतून वाद झाला. त्यावेळी सूळ यांनी त्याला तू दादा बनतो का? असे विचारले असता तू गाडीतून खाली उतर तुला दाखवतो असे म्हणत निकम नावाच्या युवकाने गाडीतून उतरल्यानंतर दांडके व दगडाने मारहाण सुरु केली. यावेळी आणखी काहीजण असल्याचेही समजते. दरम्यान, या घटनेत संतोष सूळ गंभीर जखमी झाल्याने त्यांना हॉस्पिटलमध्ये उपचारास नेण्यात आले. मात्र, त्यांचा मृत्यू झाला होता. ही घटना कळताच सातारा तालुका पोलीस ठाण्याचे अधिकारी व कर्मचाऱ्यांनी घटनास्थळी धाव घेतली. दोन संशयितांना ताब्यात घेतले असून, इतर चार ते पाच फरारी आरोपींची नावेही समोर आली असून, त्यांच्या शोधासाठी पोलिसांनी पथके रवाना झाली आहेत.