पंतप्रधानांच्या हस्ते विविध कार्यक्रमांचे उद्घाटन- साबरमती आश्रमापासून पदयात्रा
अहमदाबाद / वृत्तसंस्था
देशाच्या स्वातंत्र्याच्या अमृत महोत्सवाची म्हणजेच 75 व्या वर्षाच्या उत्सवाची सुरुवात शुक्रवारी करण्यात आली. या महोत्सवाचा प्रारंभ करण्याच्या निमित्ताने देशभरात ‘आझादी का अमृत महोत्सव’ सुरू करण्यात आले. या अंतर्गत दांडी मार्चचे आयोजन करण्यात आले असून पंतप्रधान नरेंद्र मोदी यांनी शुक्रवारी साबरमती आश्रम येथून सुरू होणाऱया पदयात्रेला हिरवा झेंडा दाखवला. तसेच विविध सांस्कृतिक आणि डिजिटल कार्यक्रमांचेही त्यांनी उद्घाटन केले. त्यानंतर पंतप्रधानांनी साबरमती आश्रमातील उपस्थितांना संबोधित केले.
पंतप्रधान नरेंद्र मोदी यांनी दांडी मार्चला गुजरातच्या अहमदाबादमध्ये हिरवा झेंडा दाखवला. 81 पादचारी या दांडी यात्रेत साबरमती आश्रमापासून 386 किलोमीटर अंतरावर असलेल्या समुद्र किनाऱयावरील दांडी या ठिकाणी जाणार आहेत. हे अंतर पार करण्यासाठी साधारण 25 दिवस लागणार आहेत. दांडी पुलावरुन प्रतिकात्मक दांडी यात्रेमध्येही पंतप्रधान मोदी सहभागी झाले. त्यांच्यासोबत यावेळी गुजरातचे मुख्यमंत्री विजय रुपाणीही उपस्थित होते. तसेच गुजरातचे राज्यपाल आचार्य देवव्रत, केंद्रीय सांस्कृतिक मंत्री प्रल्हाद सिंह पटेल या कार्यक्रमात सहभागी झाले होते.
वेगवेगळय़ा 75 ठिकाणी अमृत महोत्सवानिमित्त समारंभ सुरू झाले आहेत. भाजपच्या खासदारांनी ‘आझादी का अमृत महोत्सव’ कार्यक्रमांमध्ये सहभागी व्हावे, असे आवाहन पंतप्रधान मोदी यांनी भाजपच्या संसदीय पक्षाच्या बुधवारी झालेल्या बैठकीतही केले होते. काही कार्यक्रम पुढील 75 आठवडय़ासाठी तयार असल्याचे आणि काही कार्यक्रम लोकांच्या सल्ल्यानुसार या महोत्सवाच्या अंतर्गत केले जाणार आहेत. देशभरात ‘आझादी का अमृत महोत्सव’ अंतर्गत सायकल आणि बाईक रॅली, विविध स्पर्धा, ‘एक भारत, श्रे÷ भारत’ आणि ‘आत्मानिर्भर भारत’ या विषयांवर कार्यक्रम आयोजित केले जाणार आहेत. हा अमृत महोत्सव साजरा करण्यामागचे उद्दिष्ट म्हणजे मुले, तरुण आणि नागरिकांचा यात जास्तीत जास्त सहभाग होणे आणि महात्मा गांधींचा संदेश जनमानसापर्यंत पोहोचविणे हा आहे.
