ओबीसी शिवाय आरक्षण निघणार, 6 जूनपर्यंत हरकती दाखल करता येणार
कोल्हापूर /प्रतिनिधी
कोल्हापूर महापालिकेची 31 मे रोजी आरक्षण सोडत निघणार आहे. यासंदर्भात 6 जुनपर्यंत हरकती दाखल करता येणार आहे. राज्य निवडणूक आयोगाने सोमवारी यासंदर्भातील आदेश दिले आहेत. संगीतसूर्य केशवराव भोसले नाटय़गृह येथे सोडत निघणार आहे. प्रथमच ओबीसीशिवाय आरक्षण सोडत असणार आहे.
सर्वोच्च न्यायालयाने ओबीसीशिवाय निवडणूक प्रक्रिया सुरू करण्याचे आदेश दिल्यानंतर राज्य निवडणूक आयोगाकडून स्थानिक स्वराज्य संस्थांची निवडणूक प्रक्रिया सुरू केली आहे. यामुळे कोल्हापूर महापालिकेची ब्रेक लागलेली निवडणूक प्रक्रिया पुन्हा सुरू झाली आहे. मनपाने राज्य निवडणूक आयोगाकडे 31 वॉर्ड आणि 92 नगरसेवक असणारी प्रारूप प्रभागरचना पाठविली होती. मागील आठवडय़ामध्ये ती प्रभागरचना अंतिम करण्यात आली असून मनपाने जाहिरही केली. यानंतर आरक्षण सोडतीकडे सर्वाचे लक्ष होते. सोमवारी राज्य निवडणूक आयोगाने महापालिकेच्या आरक्षण सोडतीचा कार्यक्रम जाहीर केला. यानुसार मंगळवार 31 मे रोजी सोडत होणार आहे. अनुसूचित जाती महिला, अनुसूचित जमाती महिला व सर्वसाधारण महिला आरक्षण सोडत निघणार आहे.,
आरक्षण सोडत कार्यक्रम
27 मे – अनुसूचित जाती महिला, अनुसूचित जमाती महिला व सर्वसाधारण महिला आरक्षण सोडतीची नोटीस जाहीर करणे
31 मे – आरक्षण सोडत
1 जून – सोडतीनंतर प्रभागनिहाय आरक्षणाचे प्रारूप प्रसिद्ध
1 जून ते 6 जून – आरक्षणावर हरकती, सूचना
13 जून – अंतिम आरक्षण जाहीर करणे