ऑनलाईन टीम/तरुण भारत
नागराज मंजुळे यांनी ‘फँड्री’, ‘सैराट’, ‘झुंड’, ‘नाळ’ सारखे सुपरहिट चित्रपट दिले. या चित्रपटांना प्रेक्षकांनी अक्षरशः डोक्यावर घेतले. नागराज मंजुळे (Nagraj Manjule) यांचा सिनेमा (Films) म्हटलं की काहीतरी वेगळ, काहीतरी कल्पनेपलीकडचं पाहायला मिळतं.
‘नाळ’ हा चित्रपट मराठीतील त्याचा आतापर्यंतचा शेवटचा चित्रपट आहे. या चित्रपटात श्रीनिवास पोकळेने चैत्या, देविका दफ्तरदार यांनी त्याची आई आणि नागराज यांनी चैत्याच्या वडिलांची भूमिका साकारली होती. या चित्रपटाचा शेवट बघता या कथानकामध्ये पुढे काय होईल असा प्रश्न सगळ्या प्रेक्षकांना पडला होता. अखेर हे गुपित आता नागराज मंजुळे उलगडणार आहे.
नागराज मंजुळे यांनी एक पोस्ट शेअर करत महत्त्वाची घोषणा केली आहे. या सिनेमाच्या दुसऱ्या भागाची अर्थात ‘नाळ २’ ची घोषणा त्यांनी केली आहे. स्वत: नागराज यांनाही हा प्रश्न पडला होता की नाळच्या दुसऱ्या भागामध्ये नेमकं काय असू शकतं. पण या सिनेमाचे दिग्दर्शक-लेखक सुधाकर रेड्डी यक्कंती यांनी नागराजना दुसऱ्या सिनेमाची कथा सांगून आश्चर्यचकित केले.
नागराजने सोशल मीडियावर एक फोटो पोस्ट केला. या फोटोमध्ये सुधाकर, नागराज, देविका आणि श्रीनिवास दिसत आहेत. हा फोटो शेअर करत त्याने लिहिलं, “मागच्या महिन्यात सुधाकरने अचानक फोन करून सांगितलं की नाळचा दुसरा भाग लिहिलाय. ऐकवायला कधी भेटुयात? नाळ चा दुसरा भाग काय होऊ शकतो याबाबत माझ्याही मनात उत्सुकता तयार झाली. स्क्रिप्ट ऐकली ती इतकी अनपेक्षित तरीही सहज नि भारी होती की दोन महिन्यांच्या जय्यत तयारीनिशी फिल्मचं शूटिंग झटक्यात सुरू केलं. पहिल्या ‘नाळ’ प्रमाणेच ‘नाळ’चा दुसरा भागही संस्मरणीय होईल अशी आशा आहे! ‘नाळ २’च्या नावानं चांगभलं!”
नागराज यांच्या पोस्टनुसार सिनेमाचं शूटिंग हल्लीच सुरू झालं असून प्रेक्षकांना नाळ २ चा अनुभव घेण्यासाठी काही काळ वाट पाहावी लागेल. मात्र नागराज यांनी केलेल्या घोषणेनंतर सिनेमा कधी प्रदर्शित होणार या प्रतीक्षेत चाहते आहेत.
