नवी दिल्ली
दिल्लीतील बहुचर्चित मद्य घोटाळय़ाप्रकरणी अंमलबजावणी संचालनालयाने (ईडी) बुधवारी मद्यसम्राट समीर महेंद्रूला अटक केली. याआधी मंगळवारी सीबीआयने व्यापारी विजय नायरला अटक केली होती. दारू घोटाळय़ाप्रकरणी दिल्लीचे उपमुख्यमंत्री मनीष सिसोदिया यांच्यासह 16 जणांवर एफआयआर दाखल करण्यात आला आहे.
दिल्लीतील मद्य धोरणामध्ये (एक्साईज पॉलिसी) गैरव्यवहाराच्या आरोपाखाली सीबीआयने गेल्या महिन्यात दिल्लीचे उपमुख्यमंत्री मनीष सिसोदिया यांच्या निवासस्थानांवर छापे टाकले होते. या छाप्यांनंतर या घोटाळय़ाशी संबंधित असलेले अन्य काही जण रडारवर आले होते. याप्रकरणी दिल्लीतील मद्य धोरणाविरोधात सीबीआयने 15 जणांविरोधात गुन्हा दाखल केला आहे. यामध्ये दिल्लीचे उपमुख्यमंत्री मनीष सिसोदिया यांचे नावही समाविष्ट आहे. दिल्ली सरकारच्या मद्य धोरणाविरोधात तपास करण्याची शिफारस नायब राज्यपालांनी केली होती. त्यानुसार तपास यंत्रणा सक्रीय झाल्या आहेत. तपासादरम्यान सीबीआयच्या पथकाने उत्पादन शुल्क उपायुक्त असलेले आनंद तिवारी, तत्कालीन उत्पादन शुल्क आयुक्त अर्वा गोपी कृष्णा, कुलजीत सिंग, सुभाष रंजन यांच्या घरांवरही छापे टाकले. सीबीआयने मद्य धोरण घोटाळय़ाच्या आरोपासंदर्भात एफआयआर नोंदवला आहे. सीबीआयने दाखल केलेल्या एफआयआरमध्ये काही दारू कंपन्यांचाही समावेश आहे. या प्रकरणात मनीष सिसोदिया यांच्यावर गुन्हेगारी कट आणि खात्यांमध्ये फेरफार केल्याचा आरोपही करण्यात आला आहे.