कुपवाड / प्रतिनिधी
बामणोली (दत्तनगर) येथील फेटलिंग शॉप फोडून तब्बल सव्वा लाखाच्या कास्टींगची चोरी झाल्याची घटना शुक्रवारी उघडकीस आली. मात्र, याबाबत रात्री उशिरापर्यंत कुपवाड पोलिसात नोंद झाली नव्हती.
घटनास्थळावरून मिळालेल्या माहितीनुसार, बामणोलीतील सुखदेव फेटलिंग शाॅपचे कुलूप तोडून अज्ञात चोरट्यांनी शॉपमधील १ लाख २५ हजार रुपये किंमतीच्या कास्टींगची चोरी केली. सुखदेव धन्नाप्पा व्हनमोरे यांच्या मालकीचे सुखदेव फेटलिंग शॉप आहे. सुखदेव यांनी कुपवाड एमआयडीसीतील बाश्को इंजिनिअरिंग या कंपनीतून फेटलिंग साठी १ लाख २५ हजार रुपये किंमतीचे कास्टींग आणले होते. गुरुवारी रात्री ९ वाजता सुखदेव शाॅपला कुलूप लावून बंद करून घरी गेले होते.गुरूवारी मध्यरात्री चोरट्यांनी शाॅपचे कुलूप तोडून कास्टींगची चोरी केली. शुक्रवारी सकाळी शाॅप उघडण्यासाठी आले असता शॉपचे कुलूप तोडलेले दिसले. त्यांनी आत प्रवेश करून बघितले असता कास्टींगची चोरी झाल्याचे दिसून आले.