पोलीस अधिक्षकांच्या मार्गदर्शनाखाली कारवाई ; आतापर्यंत 4 मोक्का प्रस्तावामध्ये 44 इसमांविरूद्ध कारवाई
प्रतिनिधी/ फलटण
फलटण ग्रामीण पोलीस ठाणे येथील दाखल गुह्यातील आरोपी टोळी प्रमुख सुरज बोडरे (वय 23, रा. खामगाव ता. फलटण) व त्यांच्या 12 साथीदारांच्या विरुध्द पोलीस अधीक्षक समीर शेख यांच्या मार्गदर्शनाखाली मोक्का कायद्याअतर्गंत कारवाई कण्यात आली आहे. ज्ञानेश्वर वसंत बोडरे (वय 28), तानाजी लोखंडे (वय 30), बाबू पवार (वय 20), शंभू ननावरे (वय 22), वैभव चव्हाण (वय 26), सनी बोडरे (वय 26), श्रीकांत बोडरे (वय 38), गणेश मदने (वय 18, हे आठजण रा. खामगाव), उमेश खोमणे (वय 26, खराडवाडी ता. फलटण), रणजित भंडलकर (रा. होळरोड ता. फलटण), अमर बोडरे (रा. पिंपळवाडी ता. फलटण), सचिन मंडले (रा. साखरवाडी ता. फलटण) अशी बारा जणांची नावे आहेत.
पोलिसांनी दिलेली माहिती अशी, सुरज बोडरे व टोळीविरूद्ध पोलीस ठाण्यात खुनाचा प्रयत्न, दरोडा, खंडणी, जबर दुखापत घडवून आणण्याच्या प्रयत्नासह दरोडा, जबरी चोरी, अपनयन, जबर दुखापत, बेकायदेशीर जमाव जमवून मारहाण, शिवीगाळ, दमदाटी, अपहरण, आर्म ऍक्ट अशा प्रकारचे गंभीर स्वरुपाचे अनेक गुन्हे दाखल आहेत. टोळी प्रमुख सुरज बोडरे याने त्याच्या टोळीची दहशत पसरविण्यासाठी फलटण तालुक्यातील इतर गुन्हेगारी टोळीतील सदस्यांना एकत्र करुन दहशत पसरविल्याचे निष्पन्न झाले. त्यामुळे पोलीस निरीक्षक धन्यकुमार गोडसे यांनी या टोळीविरुद्ध दाखल गुह्यांची माहिती संकलित करुन आरोपींच्या विरुद्ध महाराष्ट्र संघटीत गुन्हेगारी नियंत्रण अधिनियमान्वये कारवाई केली.
पोलीस अधीक्षक सातारा यांचे मार्फतीने विशेष पोलीस महानिरीक्षक, कोल्हापूर परिक्षेत्र यांच्याकडे मोक्का अंतर्गत प्रस्ताव सादर केला होता. या प्रस्तावास कोल्हापूर परिक्षेत्राचे विशेष पोलीस महानिरीक्षक सुनिल फुलारी यांनी मंजुरी दिली. गुह्यात मोक्का कायद्याची कलमे लावून या गुह्याचा तपास फलटणचे उपविभागीय पोलीस अधिकारी तानाजी बरडे यांच्याकडे देण्यात आला आहे.
नोव्हेंबर 2022 पासुन एकूण 4 मोक्का प्रस्तावामध्ये 44 इसमांविरुध्द मोक्का कायद्याअंतर्गत कारवाई केली आहे. तसेच भविष्यातही सातारा जिह्यामधील सराईत गुन्हेगारांच्या विरुध्द हद्दपारी, मोक्का, एमपीडीए अशा प्रकारच्या कठोर कारवाया करण्यात येणार असल्याचे पोलीस अधीक्षक शेख यांनी सांगितले.
