प्रतिनिधी / अक्कलकोट
अक्कलकोट तालुक्यातील उत्तर पोलीस ठाण्याचे पोलीस निरीक्षक गोपाळ पवार यांची नियंत्रण कक्ष कर्तव्यार्थ पंढरपूर श्री विठ्ठल मंदिर सुरक्षा येथे तडकाफडकी बदली करण्यात आली आहे. अचानक झालेल्या बदलामुळे तालुक्यात उलटसुलट चर्चेला उधाण आले आहे. तर आता अक्कलकोट उत्तर पोलीस ठाण्यास नूतन पोलीस निरीक्षक म्हणून अनंत महिपतराव कुलकर्णी यांची नेमणूक करण्यात आली आहे.
पोलीस निरीक्षक गोपाळ पवार यांची २५ एप्रिल २०२१ रोजी अक्कलकोट उत्तर पोलीस ठाण्यास पोलीस निरीक्षक म्हणून नेमणूक करण्यात आली होती.अवघ्या चार महिन्यांच्या कालावधीनंतर तात्काळ बदली करण्यात आली आहे.दि १७ रोजी आस्थापना मंडळाची बैठक घेण्यात आली पोलीस निरीक्षक गोपाळ पवार यांची संक्षिप्त चौकशीत निष्पन्न झालेल्या कसुरीच्या अनुषंगाने पंढरपूर मंदिर सुरक्षा येथे कर्तव्यार्थ नेमणूक करण्यात आली आहे. सोलापूर नियंत्रण कक्षात कार्यरत असलेले पोलीस निरीक्षक अनंत महिपतराव कुलकर्णी यांची प्रभारी अक्कलकोट उत्तर पोलीस ठाण्यात नेमणूक करण्यात आली आहे.
याच बरोबर अक्कलकोट उत्तर पोलीस ठाण्याचे सहायक पोलीस निरीक्षक देवेंद्र राठोड यांची बदली मोहोळ पोलीस ठाण्यात करण्यात आली आहे.अक्कलकोट तालुक्यातील अवैध धंदे कायदा व सुव्यवस्था अबाधित ठेवण्यात नूतन पोलीस निरीक्षक अनंत कुलकर्णी कितपत यशस्वी होतील हा येणारा काळच ठरवणार आहे.