वृत्तसंस्था/ नवी दिल्ली
दिल्ली मद्य घोटाळ्यात अटक करण्यात आलेले दिल्लीचे मुख्यमंत्री अरविंद केजरीवाल यांच्या याचिकेवर सर्वोच्च न्यायालयात 15 एप्रिल रोजी सुनावणी होणार आहे. केजरीवाल यांनी आपल्या अटकेला आव्हान दिले आहे. सर्वोच्च न्यायालयाचे न्यायमूर्ती संजीव खन्ना आणि न्यायमूर्ती दीपंकर दत्ता यांच्या खंडपीठासमोर या याचिकेवर सुनावणी होणार आहे. दिल्ली उच्च न्यायालयाकडून कोणताही दिलासा न मिळाल्याने आम आदमी पक्षाने सर्वोच्च न्यायालयात धाव घेतली आहे. यापूर्वी उच्च न्यायालयाकडून केजरीवाल यांची अटक आणि रिमांडविरोधातील याचिका फेटाळून लावण्यात आली आहे.