वृत्तसंस्था/ चेंगशा (चीन)
बिली जिन किंग चषक सांघिक महिलांच्या आंतरराष्ट्रीय टेनिस स्पर्धेत शनिवारी झालेल्या लढतीमध्ये न्यूझीलंडने भारताचा 2-1 अशा फरकाने पराभव केल्याने या स्पर्धेत भारताने प्ले ऑफ गटात स्थान मिळविण्याची ऐतिहासिक संधी गमावली.
न्यूझीलंड आणि भारत यांच्यातील झालेल्या या लढतीमध्ये भारताच्या अंकिता रैनाला महत्वाचा दुसरा एकेरी सामना जिंकता आला नाही. तर प्रार्थना ठोंबरे समवेत दुहेरीच्या सामन्यातही भारताला हार पत्करावी लागली. या पराभवामुळे भारतीय संघाला आशिया ओसेनिया गट एकमध्ये तिसऱ्या स्थानावर समाधान मानावे लागले. भारताच्या ऋतुजा भोसलेने पहिल्या एकेरी सामन्यात न्यूझीलंडच्या बॅरीचा 6-2, 7-6 (7-5) असा पराभव केला. त्यानंतर दुसऱ्या एकेरी सामन्यात न्यूझीलंडच्या सनने अंकिता रैनाचा 6-2, 6-0 असा पराभव करत आपल्या संघाला 1-1 अशी बरोबरी साधून दिली. त्यानंतर दुहेरीच्या सामन्यात न्यूझीलंडच्या होरीगेन आणि रुटलिफ यांनी भारताच्या अंकिता रैना व ठोंबरे यांचा 6-1, 7-5 असा पराभव केला. या पराभवामुळे भारताचे आव्हान संपुष्टात आले. 6 संघांचा सहभाग असलेल्या गट एकमध्ये भारताला तिसरे स्थान मिळाले. पुढील वर्षी या स्पर्धेत भारतीय संघाला पुन्हा गट एकमधूनच खेळावे लागेल.