कोल्हापूर / प्रतिनिधी :
Senior Economist Dr. J. F. Patil passed away गेली पन्नास वर्षे अर्थशास्त्रासारख्या जटील विषयावर हुकूमत गाजवत हजारो विद्यार्थ्यांना घडविणारे, केंद्राचे बजेट असो वा राज्याचे बजेट त्याविषयी सर्वसामान्यांना समजेल अशा सुलभ भाषेत माहिती देणारे ज्येष्ठ अर्थशास्त्रज्ञ आणि शिवाजी विद्यापीठाच्या अर्थशास्त्र विभागाचे माजी विभागप्रमुख डॉ. जे. एफ. पाटील (वय ८२, रा. तारा टेरेस, राम मंगल कार्यालयाजवळ) यांचे बुधवारी रात्री आठच्या सुमारास निधन झाले.
हृदयविकाराचा झटका आल्याने त्यांना शनिवारी खासगी रुग्णालयात दाखल करण्यात आले होते. उपचार सुरू असताना त्यांची प्राणज्योत मालवली. त्यांच्या पश्चात पत्नी, मुलगा, मुलगी, सून, जावई असा परिवार आहे. उद्या (दि. ८) सकाळी ९ वाजता त्यांच्या पार्थिवावर पंचगंगा स्मशानभूमीत अंत्यसंस्कार करण्यात येणार आहेत.