|Saturday, October 20, 2018
You are here: Home » मनोरंजन » वास्तवदर्शी प्रेमकथा… आरती

वास्तवदर्शी प्रेमकथा… आरती 

मराठी सिनेमा हा नेहमीच त्याच्या संहितेसाठी ओळखला जातो. उत्तम संहितेमुळे अनेक सिनेमे आजवर लक्षवेधी ठरले आहेत. सारा क्रिएशन आणि मिनीम फाऊंडेशनची प्रस्तुती असलेल्या ‘आरती-द अननोन लव्हस्टोरी’ या सिनेमातूनही मानवी मूल्य जपणारी वास्तवदर्शी प्रेमकथा पहायला मिळणार आहे. प्रेमाची परिभाषा प्रत्येकासाठी वेगळी असते. प्रेमकथेसोबत समर्पणाची अत्यंत हृदयस्पर्शी अशी किनार या सिनेमाला लाभली आहे. वास्तवात घडलेली ही अनोखी प्रेमकहाणी जगासमोर आणण्यासाठी ज्येष्ठ अभिनेत्री वहिदा रेहमान या चित्रपटामागे उभ्या राहिल्या आहेत. या चित्रपटाची निर्मिती, लेखन, दिग्दर्शन सारिका मेणे यांनी केले आहे. 18 ऑगस्टला हा चित्रपट प्रदर्शित होणार आहे. 

आयुष्याच्या प्रत्येक वळणावर माणसाचे मन प्रेम, आपुलकी, स्नेह अशा अनंत भावनांच्या हिंदोळय़ावर झोके घेत असतं. कधी कधी आयुष्य अशा वळणावर उभं करत की, आपल्यामागे संयमाने दृढपणे उभ्या राहणाऱया आधाराची गरज भासते. आपल्याला समजून घेणारी व्यक्ती आणि नाती आपल्या आयुष्यात असणं फार महत्त्वाचं असतं मग ते नातं कोणतंही असो. आजकाल सगळय़ाच नात्याची समीकरणं बदलत चालल्याने नेमकं विश्वासाचे आणि हक्काचे नातं कोणतं हेच समजेनासं झालं आहे. या पार्श्वभूमीवर एकमेकांसाठी आयुष्य पणास लावणाऱया आरती आणि सनी यांच्या प्रेमाची अनोखी कथा आरती या सिनेमातून आपल्यासमोर येणार आहे.

चित्रपटाला साजेशी अशी वेगवेगळय़ा जॉनरची सहा गीते यात आहेत. सुजित यादव आणि तेजस बने यांनी शब्दबद्ध केलेल्या या गीतांना प्रशांत सातोसे व सुजित-तेजस यांनी संगीत दिले आहे. यातील पार्वतीच्या नंदना मोरया गजानना, पावसाळी मनी माझ्या पेटला काहूर का या गीताला गायक आदर्श शिंदे यांचा तर मन बावरे गीताला हरिहरन आणि दिपाली साठे यांचा स्वरसाज लाभला आहे. नन्ही सी परी हे अंगाईगीत व विठ्ठला हे भक्तीमय गीत प्रशांत सातोसे यांनी गायलं आहे. सुजित यादव यांनी आम्ही जातो हे गीत गायलं आहे. रोशन विचारे आणि अंकिता भोईर यांनी या चित्रपटात मुख्य भूमिका साकारली असून या दोघांसोबत सपना कारंडे, उमेश दामले, सुजित यादव, तेजस बने, मेघाली जुवेकर, प्रांजली वर्मा, कांचन पगारे तसेच बालकलाकार सारा मेणे आणि अनुष्का पाटील आदींच्या भूमिका आहेत. या चित्रपटाचे सहनिर्माते शेफाली साथी आणि बानुमती सुजित आहेत. संवाद प्रभाकर भोसले यांचे आहेत. छायांकन व संकलन जोतीरंजन दास यांचं आहे. कलादिग्दर्शक महेश मेणे आहेत. 18 ऑगस्टला आरती चित्रपट प्रदर्शित होणार आहे.

Related posts: