ऑनलाईन टीम / मुंबई :
देशात कोरोना रुग्णांची संख्या झपाट्याने वाढत आहे. अशात डॉक्टर, निवासी डॉक्टर, पोलीस इतर अत्यावश्यक सेवेतील कर्मचारी आपल्या जीवाची पर्वा न करता देशाची आणि रुग्णांची सेवा करत आहेत. दरम्यान, ‘कोविड योद्धा’ असलेल्या निवासी डॉक्टरांच्या अंतिमवर्ष परीक्षांबाबत योग्य निर्णय घेण्याबाबत मनसे नेते अमित ठाकरे यांनी मनसे शिष्टमंडलासह राज्यपाल भगतसिंह कोश्यारी यांची भेट घेतली.
यावेळी अमित ठाकरे म्हणाले की, माझी आपल्याला आग्रहाची विनंती आहे की, वैद्यकीय आणीबाणीच्या सध्याच्या काळात निवासी डॉक्टरांवर कोणताही अतिरिक्त ताण पडू नये, यासाठी आपण योग्य ती खबरदारी घ्यायला हवी. त्यासंदर्भात या निवासी डॉक्टरांनीच सुचवलेला पर्याय मी माझ्या पत्रासोबत जोडत आहे. त्यांनी सुचवलेल्या पर्यायाची आपण गांभीर्याने दखल घ्यावी व योग्य तो निर्णय घेऊन या विद्यार्थ्यांना दिलासा द्यावा अशी विनंती राज्यपाल यांना मनसे कडून करण्यात आली आहे.
आपण मांडलेले विषय महत्वाचे आहेत. असे म्हणत राज्यपाल भगतसिंग कोश्यारी यांनी मी यामध्ये लक्ष घालतो असे आश्वासन मनसेच्या शिष्टमंडळाला दिले आहे.
दरम्यान, मनसे नेते अमित ठाकरे यांनी उपमुख्यमंत्री अजित पवार यांना देखील एक पत्र लिहिले आहे. या पत्रात त्यांनी ‘आशा’ स्वयंसेविकांचा मासिक मोबदला वाढवून देण्यात यावा, अशी मागणी केली आहे. हे पत्र अमित ठाकरेंनी यांनी सोशल मीडियावर शेअर केले आहे.