नवी दिल्ली / वृत्तसंस्था
अमेरिकन नौदलाने दादागिरी करून भारताच्या समुद्र हद्दीत घुसून लक्षद्वीपजवळ युद्धनौकेने सराव केल्याचे उघड झाले आहे. यासाठी आम्हाला पूर्व परवानगी घेण्याची गरज नाही, अशी धक्कादायक भूमिका अमेरिकेने व्यक्त केल्यानंतर सरकारच्या धोरणांवर टीका होत आहे. 7 एप्रिलला अमेरिकेची युद्धनौका युएसएस जॉन पॉल जोन्सने भारताची परवानगी न घेता लक्षद्वीपपासून 130 समुद्र मैल अंतरावर भारताच्या हद्दीत घुसून सराव केला. ही युद्धनौका क्षेपणास्त्रभेदी असल्याची माहितीही उपलब्ध झाली आहे.
अमेरिकेच्या सातव्या आरमाराने यासंबंधी एक वक्तव्य जारी केले आहे. अमेरिकन नौदलाने केलेली ही कृती आंतरराष्ट्रीय कायद्यांना धरून असल्याचे त्यांनी स्पष्ट केले. या विशेष आर्थिक क्षेत्रातून जाण्यासाठी अथवा युद्धसराव करण्यासाठी पूर्वसूचना देणे आवश्यक असल्याचा दावा भारत करत असला तरी आपली कृती आंतरराष्ट्रीय कायद्यानुसार योग्य असल्याचा दावा अमेरिकेने केला आहे.