जि. प. चा निर्णय : जिल्हा नियोजन समितीकडे 25 लाखाची मागणी
प्रतिनिधी / सिंधुदुर्गनगरी:
भंडारा जिल्हा रुग्णालयाला लागलेल्या आगीत नवजात बालकांचा मृत्यू झाल्यानंतर त्याची गंभीर दखल घेत आता सिंधुदुर्ग जिल्हय़ातील सर्व प्राथमिक आरोग्य केंद्रांचे फायर ऑडिट करण्याचा निर्णय जिल्हा परिषदेने घेतला आहे. त्यासाठी जिल्हा नियोजन समितीकडे 25 लाखाच्या निधीची मागणी केली आहे.
भंडारा जिल्हा रुग्णालयाला लागलेल्या आगीच्या दुर्घटनेनंतर राज्य शासनाने याची गंभीर दखल घेत जुन्या इमारतींचे फायर ऑडिट करण्याचे आदेश दिले होते. तसेच पालकमंत्री उदय सामंत यांनीही जिल्हय़ातील सर्व जुन्या इमारतींचे फायर ऑडिट करण्याच्या सूचना दिल्या आहेत. त्यानुसार काही विभागांनी आपापल्या विभागातील जुन्या इमारतीचे फायर ऑडिट करण्याची कार्यवाही सुरू केली आहे.
जिल्हय़ात 38 प्राथमिक आरोग्य केंद्रे असून काही आरोग्य केंद्रांच्या इमारती जुन्या झाल्या आहेत. तसेच उपकेंद्राच्याही काही इमारती जुन्या झाल्या आहेत. त्यामुळे तातडीने फायर ऑडिट करण्याचा निर्णय घेण्यात आला असून त्यासाठी 25 लाखाचा निधी देण्याची मागणी जि. प. प्रशासनाने जिल्हा नियोजन समितीकडे केली आहे.