एका जुन्या मराठी गाण्यातले शब्द आहेत, ‘एक आलो हुडकायला, दुसरंच गावलं.’ गेल्या आठवडय़ात रसेल फॉस्टर हे नाव टीव्हीवर आणि नंतर पेपरात पुनः पुन्हा आढळत राहिले. विधिमंडळात चर्चा चालू असताना सुधीर मुनगंटीवार यांनी या नावाचा उल्लेख केला. सदरहू सद्गृहस्थांनी (म्हणजेच रसेलरावांनी) कोणत्या महिन्यात जन्मलेल्या व्यक्तींची काय वैशिष्टय़े असतात हे लिहिलेले आहे. त्यावरून जुलै महिन्यात जन्मलेल्या विविध नेत्यांची गुणवैशिष्टय़े दुसऱया सदरहू सद्गृहस्थांनी (म्हणजेच सुधीररावांनी) सांगितली. टीआरपी मिळत असल्याने आधी टीव्हीवाल्यांनी आणि नंतर वर्तमानपत्रांनी त्यांना प्रसिद्धी दिली. रविवारच्या सदरलेखनाला विषय मिळाला म्हणून खुश झालेल्या स्तंभलेखकांनी त्यांना उरलेली प्रसिद्धी दिली. एक फिरंगी माणूस किती मराठी माणसांच्या कामास येतो पहा.
अस्मादिकांनादेखील कुतूहल वाटले म्हणून आंतरजालावर रसेलरावांचा शोध घेतला. तर पहिल्या फेरीत रसेल फॉस्टर नावाचे कोणी ज्योतिषी सापडले नाहीत. पण या नावाचे अतिशय विद्वान न्यूरोलॉजिस्ट आहेत. निद्रा या विषयावर त्यांनी काही संशोधन व लेखन केले आहे असे आढळले. निद्रा हा आपला प्रिय विषय असल्याने आणि इथवर आलोच आहोत तर चार पावले पुढे जाऊ या विचाराने या रसेलरावांचे विचारधन वाचले. त्यातले काही कण आवर्जून इथे वाटण्याजोगे आहेत. अल्कोहोल ऊर्फ मद्य मेंदूतल्या महत्त्वाच्या प्रक्रिया विस्कटून टाकते उदाहरणार्थ स्मृतींचे एकत्रीकरण. सकाळच्या नैसर्गिक उजेडाला जास्तीत जास्त सामोरे जायला हवे, त्यातून आपल्या शरीरातील झोपेचे आणि जागृतीचे घडय़ाळ व्यवस्थित काम करीत राहते. दिवसभरात आपण खर्च केलेली ऊर्जा रात्रीच्या झोपेत भरून निघते. आपण झोपतो तेव्हा शरीरातली काही जनुके कार्यरत होऊन काही महत्त्वाची कामे करीत असतात. पाश्चात्यांनी एखादा शोध लावल्याचे प्रसिद्ध झाले की तो शोध आपल्या पूर्वजांनी आधीच लावला होता हे सांगण्याची आपल्याकडे प्रथा आहेच. रसेलरावांनी सांगितलेल्या अनेक गोष्टी पुणेकरांच्या पूर्वजांना ठाऊक असणारच. म्हणजे रसेलराव म्हणतात की माणूस झोपतो तेव्हा त्याच्या शरीरातल्या 110 कॅलरीजची बचत होते. पुणेकरांना हे आधीच ठाऊक असल्याने ते दुपारी 4 तास झोपून ते अतिरिक्त 55 कॅलरीजची बचत करीत असणार. त्यामुळेच दुपारची वामकुक्षी घेताना कोणी येऊन कॅलरी संकलनात अडथळा आणू नये अशी त्यांची माफक अपेक्षा असणार.