प्रतिनिधी / कोल्हापूर
प्रसिद्ध उद्योगपती शामराव गणपत चौगुले (वय 86) यांचे कर्करोगाने निधन झाले. वयाच्या 86 व्या वर्षी मुंबईतील वरळी येथील निवासस्थानी रविवारी सकाळी 11 वाजता त्यांनी अखेरचा श्वास घेतला. करवीर तालुक्यातील नांदगाव येथे सामान्य शेतकरी कुटुंबात जन्मलेल्या शामराव चौगुले यांनी उद्योग क्षेत्रात नावलौकिक कमावला. भारतातील वाईन उद्योगाचे ते जनक होते.
पहिल्या भारतीय शॅम्पेनची निर्मिती त्यांनी केली. आज त्यांच्या वाईनचे ब्रँड अनेक देशात विकले जातात. आपल्या उद्योगामध्ये त्यांनी 1 हजारहून अधिक कुटुंबांना रोजगार दिला होता. ते शॅम्पेन इंडेज ग्रुपचे चेअरमन, ऑल इंडिया वाईन मॅन्युफॅक्चरिंग असोसिएशनचे संस्थापक व प्रथम अध्यक्ष होते. तसेच कोल्हापुरातील हॉटेल शालिनी पॅलेसचे मालक होते. त्यांचे कोल्हापूरवासीयांचे व येथील अनेक संस्थांचे जिव्हाळ्य़ाचे संबंध होते. केंद्र सरकारच्या ग्रेप्स प्रोसिसिंग बोर्डाचे प्रथम संस्थापक अध्यक्षपद त्यांनी भूषवले आहे. कोल्हापूर महापालिकेस त्यांनी गजलक्ष्मी हत्तीण भेट दिली होती. त्यांच्या निधनाने उद्योग क्षेत्रामध्ये हळहळ व्यक्त होत आहे. त्यांच्या पश्चात पत्नी, दोन मुले, भाऊ, पुतणे असा मोठा परिवार आहे.