भारतासह जगभर नाताळ व नववर्षाच्या स्वागताची तयारी सुरू असताना ब्रिटनमध्ये कोरोना विषाणूचा नवा प्रकार आढळून आल्याने सर्वत्र पुन्हा निर्बंधाच्या दिशेने पावले पडू लागली आहेत. लंडनमध्ये लॉकडाउन लागू करण्यात आला असून, युरोपातील अनेक देशांसह विविध देशांनी आपल्या सीमा वा विमानसेवा बंद करण्याची भूमिका घेतली आहे. जवळपास वर्षभर कोरोनाशी झुंजणाऱया अवघ्या विश्वापुढचे हे न्यू चॅलेंजच म्हणता येईल. किंबहुना, डगमगून वा घाबरून न जाता या टप्प्यातही जागरूकपणे नि सामूहिकरीत्या या संकटाशी मुकाबला करावा लागेल. 2020 हे वर्ष जगासाठी सर्वार्थाने आव्हानात्मक राहिले आहे. कोरोनामुळे माणसाच्या जगण्याचे संदर्भच अंतर्बाहय़ बदलून गेले आहेत. उद्योगधंदे, अर्थकारणासह मानवी आयुष्याशी निगडित सर्व क्षेत्रांना कोरोनाची मोठी झळ बसल्याने सर्व स्तरांतील लोकांच्या जीवनावर त्याचे दूरगामी परिणाम झालेले दिसतात. सरत्या वर्षातील कटू स्मृतींना मागे टाकत नव्या वर्षी आयुष्य सुकर होण्याचा विश्वास मनामनात जागत असताना ब्रिटनमध्ये कोरोनाचा नवा अवतार सापडावा, हे लढाई अजून पूर्णत: संपली नसल्याचेच निदर्शक होय. म्हणूनच कोरोनाची साथ ही दीर्घकालीन असून, हा सामना दीर्घकाळ चालणार, हे आता गृहीत धरायला हवे. नवा विषाणू हा 70 टक्के अधिक वेगाने पसरणारा असल्याचे सांगितले जात आहे. तज्ञांच्या मते या विषाणूची तीव्रता ही कोविड 19 पेक्षा कितीतरी जास्त आहे. लंडनमध्ये आढळलेल्या नवीन कोविड रुग्णांपैकी 60 टक्के रुग्ण हे या नव्या प्रकारातील विषाणूच्या संसर्गाचे असल्याचे सिद्ध होणे, यातूनच त्याचा झपाटा लक्षात येतो. नवा व्हायरस हा जीवघेणा आणि अनियंत्रित असल्याचे ब्रिटनचे आरोग्यमंत्री मॅट हॉन्कॉक सांगतात. तर पंतप्रधान बोरिस जॉन्सन यांनी मंत्रिमंडळाची आपत्कालीन बैठक बोलावत व्यक्त केलेली चिंताही सांप्रत स्थितीचे गांभीर्य दाखवून देते. वुहानमध्ये सर्वप्रथम कोरोना विषाणू आढळल्यानंतर त्याबाबत गुप्तता ठेवण्यातच चीनने धन्यता मानली होती. मात्र, ब्रिटनने नव्या संकटाविषयी सर्वांना अवगत करून देण्याची घेतलेली भूमिका प्रगल्भपणाचे लक्षण म्हणायला पाहिजे. बदललेल्या विषाणूमध्ये मूळ विषाणूपेक्षा 23 प्रकारचे नवे बदल दिसून आल्याकडे संशोधकांनी अंगुलीनिर्देश केला आहे. संसर्गाच्या पातळीवर हा विषाणू पहिल्यापेक्षा दोन पावले पुढे असला, तरी मृत्यूदरात अद्यापपर्यंत बदल झालेला नसणे, ही समाधानकारक बाब म्हणता येईल. अर्थात पुढच्या वळणावर त्याचे उपद्रवमूल्य किती व कसे राहणार, यावरूनच अंतिम निष्कर्ष काढता येऊ शकतो. 25 डिसेंबरला साजरा होणारा ख्रिसमस हा ब्रिटनमधील प्रमुख सण. थर्टी फर्स्ट व न्यू इयर सेलिब्रेशनही तितकेच महत्त्वाचे. परंतु, हा उत्सव यावर्षी लंडनवासियांना घरातच साजरा करावा लागेल. विषाणूचा सर्वाधिक प्रभाव हा लंडनसह दक्षिण ब्रिटनमध्येही जाणवत आहे. स्वाभाविकच येथून बाहेर पडण्यासाठी लोक गर्दी करत आहेत. दुसऱया बाजूला जर्मनी, इटली, फ्रान्ससह अनेक देशांनी आपल्या सीमा सील करण्याचा निर्णय घेतला आहे, तर हाँगकाँग, इस्राईल, इराणपासून ते भारतापर्यंत अनेक देशांनी प्रवासावर निर्बंध घातले आहेत. नव्या विषाणूचा प्रादुर्भाव टाळण्यासाठी विविध देशांनी योजलेले हे उपाय स्वाभाविकच म्हणावे लागतील. घाबरून जाऊ नका. फक्त ऍलर्ट रहा, ही केंद्रीय आरोग्यमंत्री हर्षवर्धन यांनी केलेली सूचनाही यथायोग्य म्हणता येईल तर महाराष्ट्राचे मुख्यमंत्री उद्धव ठाकरे यांचा नाइट कर्फ्यूबाबतचा आदेशही सध्याची परिस्थिती बघता वास्तववादी ठरतो. या आदेशानुसार सर्व महापालिका क्षेत्रात रात्री 11 ते सकाळी 6 पर्यंत संचारबंदी असेल. महाराष्ट्रातील पुणे, मुंबई, पिंपरी-चिंचवडसारख्या महानगरांमध्ये प्रामुख्याने दिसून आलेली कोरोनाची दहशत लक्षात घेता सजगता बाळगणे अत्यावश्यक ठरते. त्याचबरोबर मध्य-पूर्व देशातून येणाऱया प्रवाशांना 14 दिवस संस्थात्मक व इतर देशातून येणाऱयांना होम क्वारंटाइन करण्यात येणार आहे. राज्यात पहिल्या टप्प्यात कोविडचा चंचुप्रवेश हा परदेशातून आलेल्या प्रवाशांमार्फतच झाला होता. हा अनुभव ध्यानात घेऊन त्या पातळीवर दक्षता बाळगावीच लागेल. जून ते सप्टेंबरदरम्यान देशामध्ये कोरोनाचे रुग्णांसह मृत्यूदरही अधिक होता. नोव्हेंबरपासून यामध्ये लक्षणीय घट दिसून आली. त्यामुळे वातावरण बऱयापैकी सुरळित व्हायला आता कुठे सुरुवात झाली होती. कोरोना समूळ संपला, असा समज बाळगत काहींनी मास्क वापरणेही सोडून दिल्याचे चित्र पहायला मिळत होते. तथापि, नव्या प्रकाराने दिलेली धोक्याची घंटा दुर्लक्षून चालणार नाही. डिसेंबर व जानेवारीत दुसरी लाट येण्याचा वैद्यकीय क्षेत्रातील धुरिणांकडून वर्तविण्यात आलेला अंदाज 100 टक्के खरा ठरला नसेलही. परंतु, तो पूर्णपणे खोटाही ठरलेला नाही, हे ब्रिटन व अन्य देशांमध्ये आढळलेल्या विषाणू बदलाने दाखवून दिले आहे. लंडनमधून भारतात आलेले प्रवासी पॉझिटिव्ह सापडणे, हेही चिंताजनक होय. कोरोना प्रतिबंधाच्या दृष्टीने जगभरात लसीकरणाचा कार्यक्रम राबविण्यात येत असून, ब्रिटनमध्येच त्याला सर्वप्रथम सुरुवात झाली आहे. भारतात जानेवारीपासून लसीकरण सुरू होणार आहे. फायझर, ऑक्सफर्ड-ऍस्टाझोनिका, मॉडर्नासह अनेक लसींची निर्मिती झालेली आहे. लसीकरण हादेखील दीर्घकालीन टप्पा असला, तरी नव्या विषाणूमुळे लस कितपत प्रभावी ठरणार, अशीही एक साशंकता व्यक्त होताना दिसते. अर्थात नव्या विषाणूच्या दृष्टीनेही ही लस तितकीच प्रभावी असेल, हा कंपन्यांचा दावा आश्वासक म्हणावा लागेल. सुरुवातीच्या टप्प्यात आरोग्य क्षेत्रातील कर्मचाऱयांना व ज्येष्ठांना लस दिली जाणार आहे. त्यानंतर ती सर्वसामान्यांपर्यंत पोहोचेल. तोपर्यंत सोशल डिस्टन्सिंग, मास्क व हात स्वच्छ धुणे या तीन गोष्टींचेच तंतोतंत पालन करणे सर्वांच्या हातात असेल. टोटल लॉकडाउन आजमितीला कुठल्याच घटकास परवडणारे नाही. म्हणूनच नवीन वर्षाचे स्वागत संयमाने, जागरूकतेने व टापटिपेने झाले तर 2021 खऱया अर्थाने आनंदमय व निरामय होईल.
Previous Articleन्याहारीचा रंग निराळा
Tarun Bharat Portal
Parasharam Patil is a versatile content writer, scriptwriter, and content producer at Tarun Bharat Media. Specializes in editorial news, local news entertainment, and political content. His captivating storytelling and deep industry knowledge make him an expert in crafting engaging narratives.