लॉजिस्टिक्स क्षेत्रात 2500 जणांना मिळणार रोजगार
वृत्तसंस्था/ चेन्नई
लॉजिस्टिक्स क्षेत्रात फ्लिपकार्ट आता अदानी ग्रुपबरोबर भागीदारी करणार आहे. या भागीदारीच्या माध्यमातून येणाऱया काळात 2500 जणांना रोजगार मिळणार असल्याची माहिती देण्यात आली आहे.
चेन्नईत अदानीच्या डाटा केंद्राच्या माध्यमातून फ्लिपकार्ट आपली सेवा देणार आहे. लॉजिस्टिक्स व डाटा सेंटरच्या क्षेत्रात या भागीदारीनंतर फ्लिपकार्टला मोठा फायदा होणार आहे. अदानी ग्रुपबरोबर फ्लिपकार्टने व्यावसायिक भागीदारी करण्याचे सुनिश्चित केले आहे. लॉजिस्टिक्स क्षेत्रात कार्यरत असणाऱया अदानी लॉजिस्टिक्सच्या मदतीने फ्लिपकार्टला आपल्या साहित्याचा पुरवठा करणे आणखी सोयीचे होणार आहे. या क्षेत्रात भागीदारीतून 2500 जणांना नव्याने रोजगार उपलब्ध करून दिला जाणार आहे. चेन्नईत स्थापन केलेले अदानी कोनेक्स हे डाटा सेंटर एजकोवेक्स व अदानी एंटरप्रायझेस लि. यांनी संयुक्तपणे सुरू केले आहे.
सदरच्या महत्त्वाच्या भागीदारीनंतर फ्लिपकार्टची पुरवठा साखळी आणखी मजबूत होण्यास मदत होणार आहे. अदानीने आगामी काळात मुंबईत माल उतरवण्यासाठी 5.34 लाख चौ. फुट क्षेत्रफळाच्या जागेत साठवणूक गोडावून बांधण्याचे ठरवले आहे. यामुळे फ्लिपकार्टला आपला व्यवसाय वाढवता येईल.