वार्ताहर / सांबरा
बसवण कुडची येथे श्री कलमेश्वर, श्री बसवाण्णा व श्री ब्रह्मदेव यात्रेनिमित्त मंगळवारी इंगळय़ांचा कार्यक्रम हजारो भाविकांच्या उपस्थितीत पार पडला. सायंकाळी मंदिरात विधिवत पूजन झाल्यानंतर इंगळय़ांचा कार्यक्रम झाला.
दरवर्षी या कार्यक्रमाला परिसरातील हजारो भाविकांची उपस्थिती असते. मात्र, यंदा कोरोनाच्या पार्श्वभूमीवर यात्रा गाव मर्यादित करण्याचे ठरविण्यात आले होते. तरी देखील भाविकांची मोठी गर्दी दिसून आली. भाविकांच्या गर्दीमुळे मुख्य रस्त्यावर रहदारी खोळंबली होती. वाहतूक सुरळीत होण्यासाठी बराच उशीर लागला. रात्री उशिरापर्यंत गावात भाविकांची गर्दी होती. बुधवारी आणि गुरुवारी खळय़ांच्या कुस्त्या होणार आहेत.