स्वाब घेण्यासारखे सर्वाधिक जोखमीचे काम डॉ. विनायक सरजेंवर
- आतापर्यंत त्यांनी घेतलेत 170 च्या वर स्वाब नमुने
- पी. पी. ई. किट घालून दिवसभर राहाणे दिव्यच
- डॉ. सरजे म्हणाले, डय़ुटी बजावताना अभिमान वाटतो
शेखर सामंत / सिंधुदुर्ग:
‘बाबा सांगाना, तुम्ही घरी कधी येणार? रोज सांगताय आज येतोय, उद्या येतोय म्हणून आणि तुम्ही येतच नाहीत. आम्हाला फार कंटाळा आलाय’. आयसोलेशन विभागातील काम आटोपून आल्यानंतर आरामाकरिता खोलीवर पाठ टेकायची, तर घरच्यांचे फोन. काय, कसे आहात, कधी येणार? उत्तरं द्यायलाही त्राण नसते. इच्छा असते, तात्काळ घरी जाऊन मुलांना जवळ घ्यावं, बायकोशी निवांत गप्पा माराव्यात. कुटुंबासह महिनाभराचा थकवा, टेन्शन, ताण घालवावा, अस वाटतं. पण लगेचच डय़ुटी, जबाबदारी कर्तव्य, वैद्यकीय पदवी घेताना घेतलेली शपथ नजरेसमोरून तरळते. मग दुसरं मन पहिल्या मनाची समजूत घालतं, ‘नाही पहिलं कर्तव्य महत्वाचं’ आणि मग हे सर्व विचार बाजूला होतात.
सिंधुदुर्गच्या जिल्हा रुग्णालयातील कोरोनासाठी सुरू केलेल्या आयसोलेशन विभागात सर्वाधिक जोखमीची म्हणून ओळखली जाणारी कोरोना संशयितांचे स्वाब घेण्याची जबाबदारी सांभाळणारे नाक-कान-घसा तज्ञ डॉ. विनायक सरजे ‘तरुण भारत’शी बोलताना आपल्या मनातील घालमेल व्यक्त करीत होते. मात्र अशाही परिस्थितीत समाजावर कोसळलेल्या या महाभयानक संकटाचा मुकाबला करण्यासाठी सर्व धोका अंगावर घेत सीमेवरील सैनिकाप्रमाणे लढण्याची संधी आपणास मिळाली, याबद्दल ते स्वत:स भाग्यवानही समजत असल्याचे सांगतात.
ही लढाई अदृश शक्तीविरुद्धची
जगभर थैमान घातलेल्या कोरोना रुग्णांवर उपचार करताना अनेक डॉक्टरना देखील आपला प्राण गमवावा लागल्याची अनेक उदाहरणे समोर येत आहेत. मानवजात संपवायला निघालेला अदृश शत्रू म्हणून ज्याला सगळं जग ओळखू लागलंय, त्या कोरोना व्हायरस विरुद्धच्या सिंधुदुर्गातील लढाईचे नेतृत्व डॉ. सरजे यांनी आपल्या खांद्यावर घेतलंय. कोरोना संशयित व कोरोना बाधितांचे स्वाब घेण्याची सर्वाधिक जोखमीची जबाबदारी त्यांनी स्वीकारलीय. आतापर्यंत 190 रुग्णांचे स्वाब त्यांनी घेत ही जोखमीची जबाबदारी अगदी हसत-हसत स्वीकारली. त्यांना माहीत आहे की, थोडी जरी कुठे चूक झाली, तरी आपले प्राण जोखमीत आहेत. पण मोठय़ा धैर्याने ते ही जबाबदारी पार पाडत आहेत.
डॉ. सरजे यांनी आठ महिन्यांपूर्वीच जिल्हा रुग्णालयात जबाबदारी स्वीकारली. कोरोना सुरू होताच ते समजून चुकले की या कोरोनाविरुद्धच्या लढाईत आपल्यावर मोठी जबाबदारी येणार. त्यामुळे त्यांनी येईल ती जबाबदारी स्वीकारण्यासाठी अगोदरच मनाची तयारी करून ठेवली होती. आयसोलेशन विभागात आतापर्यंत त्यांनी जवळपास 190 जणांचे स्वाब घेतलेत. अगदी 28 दिवसांच्या बाळाचाही त्यांनी स्वाब घेतला.
स्वाब घेण्याची प्रक्रिया जोखमीची
या स्वाब घेण्याच्या प्रक्रियेबाबत बोलताना डॉ. सरजे म्हणाले, मुळात या कोरोनापासून स्वत:च्या सुरक्षेसाठी पुरविण्यात आलेली पी. पी. ई. किट घालून डय़ुटी सांभाळणे खूप जिकिरीचे असते. आणि सध्याच्या 40 डिग्रीपर्यंत पोहोचलेल्या कडक उन्हाळय़ात रेनकोट घालण्यासारखा हा प्रकार आहे. हे किट अंगावर घालून वावरतानाच खरं तर शरीरातील एनर्जी संपून जाते. त्यात ज्याचा स्वाब घ्यायचा असतो, तो रुग्ण कोरोनाच्या भीतीने अगोदरच घाबरलेला असतो. प्रथम त्याच्या मनातील भीती घालवावी लागते व त्यानंतर त्याला संपूर्ण प्रोसिजर समजावून सांगावी लागते. नंतरच त्याचा स्वाब घ्यावा लागतो. हा ‘स्वाब’ नाकातून घ्यावा लागतो. घशाचा नमुना देखील घेऊ शकतो. हा स्वाब घेताना रुग्ण अचानक खोकला वा शिकंला, तर अचानकपणे त्याच्या तोंडातून व नाकातून विषाणू बाहेर पडू शकतात. पेशंट अत्यवस्थ असेल वा लहान बाळ असेल, तर स्वाब घेताना अधिक जोखीम पत्करावी लागते. कारण रुग्णाच्या सर्वात जास्त जवळ आपणच असतो. त्यामुळे आपणास अधिक धोका असतो. मात्र स्वत:च्या सुरक्षेसाठी आवश्यक त्या सर्व उपाययोजना करीत असल्याने या संभाव्य धोक्यापासून अद्यापपर्यंत तरी आपण दूर आहे, असे ते म्हणाले.
गेले दीड महिना कुटुंबापासून लांब
आपल्या कुटुंबियांबाबत बोलताना डॉ. सरजे म्हणतात, ‘मी मागील दीड महिन्यापासून घरी मुलांना भेटायला गेलेलो नाही. याच डय़ुटीमध्ये व्यस्त आहे. पत्नी आणि आठ आणि चार वर्षांची दोन मुलं आहेत. माझ्याकडे अत्यंत जोखमीचे काम असल्यामुळे पत्नी खूप काळजी करीत असते. तर दोन्ही मुलं बाबा कधी येणार याची वाट पहात असतात. व्हीडिओ कॉल करून आम्ही रोज संपर्क साधत असतो. घरी जावसं खूप वाटतं. थकवाही येतोय. आरामाची गरजही वाटते. पण सध्यातरी एकटय़ावर ही महत्वाची जबाबदारी असल्यामुळे घरी जाण्याचा मोह मी टाळतो.
रुग्णसेवा हे माझं पहिलं कर्तव्य!
घरापासून दूर, कुटुंबाची ताटातूट हे सर्व जरी असले, तरी या संकटप्रसंगी लोकांसाठी आघाडीवर राहून काहीतरी करायची संधी मिळते, याचा मला फार अभिमान वाटतो. या वैद्यकीय पेशात शिरल्यानंतर रुग्णसेवा हे माझे पहिले कर्तव्य आहे आणि ते आपण मनापासून निभावत असल्याचे ते सांगतात. या कामी आम्हाला सदैव जिल्हा शल्य चिकित्सक डॉ. धनंजय चाकुरकर आणि अन्य वरिष्ठ वैद्यकीय अधिकाऱयांचं उत्तम सहकार्य मिळत असल्याचेही ते आवर्जून नमूद करतात.