प्रतिनिधी / खेड :
तालुक्यातील नांदगाव – मोहल्ल्यातील दोन सख्ख्या भावंडांचा जगबुडी नदीपात्रात बुडून मृत्यू झाल्याची घटना शनिवारी सायंकाळच्या सुमारास घडली. अबरार आरिफ कादरी (९), जियाद आरिफ कादरी (६) अशी मृत भावंडांची नावे आहेत. या घटनेने गावावर शोककळा पसरली आहे.
हे दोघेजण शेळ्या चारण्यासाठी जगबुडी नदीकिनारी गेले होते. जियाद हा नदीकिनारी गेला असता अचानक त्याचा तोल जावून पाण्यात पडला. त्याला वाचवण्यासाठी अबरार तेथे गेला असता त्याचाही पाय घसरून नदीपात्रात पडला. पाण्याचा प्रवाह वाढल्याने दोघेही पाण्यात बुडून मृत्यूमुखी पडले. सायंकाळी उशिरापर्यंत दोघेही घरी न परतल्याने कुटुंबियांसह ग्रामस्थांनी शोध मोहीम हाती घेतली.
सायंकाळी उशिरा या दोघांचे मृतदेह जगबुडी नदीकिनारी तरंगताना आढळले. होडीच्या सहाय्याने दोन्ही मृतदेह नदीपात्रातून बाहेर काढण्यात आले. याप्रकरणी येथील पोलीस स्थानकात आकस्मिक मृत्यूची नोंद करण्यात आली आहे . त्यांच्या पश्चात आईवडील, दोन बहिणी असा परिवार आहे.