वृत्तसंस्था / नवी दिल्ली
भारताची अनुभवी महिला क्रिकेटपटू वेदा कृष्णमूर्तीला दोन आठवडय़ांच्या कालावधीत कोरोनामुळे दोन जबरदस्त कौटुबिक धक्क्यांना सामोरे जावे लागले. वेदाने पंधरवडय़ांच्या कालावधीत आपल्या आईला आणि बहिणीला गमवले आहेत.
बेंगळूरच्या वेदा कृष्णमूर्तीची आई चेलूवंबादेवी यांचे गेल्या महिन्यात कोरोनामुळे निधन झाले होते. 24 एप्रिल रोजी वेदाच्या आईला कोरोनाने हिरावून घेतले होते. तर चिक्कमंगळूरमध्ये राहणारी वेदाची बहिण 45 वर्षीय वत्सला शिवकुमार हिचे बुधवारी रात्री एका खासगी रूग्णालयात कोरोनाने निधन झाले. वेदा कृष्णमूर्तीने आपल्या वैयक्तिक क्रिकेट कारकीर्दीत 48 वनडे आणि 76 टी-20 सामन्यात भारताचे प्रतिनिधीत्व केले आहे. आपण स्वतः कोरोना चाचणी केली आणि त्यामध्ये आपण निगेटिव्ह असल्याचे वेदाने सांगितले. कर्नाटकामध्ये ऑक्सिजनचा तसेच महत्त्वाच्या औषधांचा आणि कोरोना लसीचा मोठय़ा प्रमाणात तुटवडा भासत असल्याने राज्यातील कोरोना स्थिती अधिक चिंताजनक असल्याचे वेदा कृष्णमूर्तीने म्हटले आहे.