वृत्तसंस्था/ नवी दिल्ली
चीनी कंपनी शाओमीचा बहुप्रतिक्षीत ‘एमआय 11 अल्ट्रा’ स्मार्टफोन ग्राहकांना मिळण्यास आणखी काही दिवस जावे लागणार असल्याचे कंपनीने नुकतेच स्पष्ट केले आहे. सदरच्या फोनबाबत ग्राहकांकडून कंपनीकडे विचारणा करण्यात येत होती. अखेर कंपनीने सदरच्या फोनच्या विलंबाबाबत खरं कारण सांगून टाकलं आहे.
सद्यस्थितीत एमआय 11 अल्ट्रा स्मार्टफोन वितरणात अडथळे जाणवत असून अनिश्चित काळासाठी हा फोन ग्राहकांकरीता उपलब्ध होणार नसल्याचे कंपनीने स्पष्ट केले आहे. सदरचा फोन एप्रिलअखेर लाँच केला होता, ज्याची किंमत 69 हजार 999 रुपये इतकी असणार आहे. यासोबत कंपनीने एमआय 11 एक्स आणि एमआय 11 एक्स प्रो हे दोन किफायतशीर किंमतीचे फोन सादर केले होते. 11 एक्स व 11 एक्स प्रो हे दोन्ही फोन ग्राहकांकरीता त्याचवेळी खरेदीकरीता उपलब्ध केले गेले. अल्ट्रा या फोनबाबत पहिल्यांदाच असं झालंय की लाँच झाला पण नंतर ग्राहकांकरीता खरेदीकरता उपलब्ध झाला नाही.
स्पष्टता नाहीच
सदरच्या फोनच्या शिपमेंटबाबत (जल मालवाहतुक) अनंत अडथळय़ांना कंपनीला सामोरे जावे लागते आहे, असे कळते. या फोन्सचा भारतात पुरवठा होण्यास आणखी काही कालावधी लागणार असल्याचे कंपनीने स्पष्ट केले आहे. पण हा कालावधी किती लागणार आहे याचे स्पष्टीकरण मात्र कंपनीला करता आलेले नाही.