प्रतिनिधी / मिरज
मिरज शहर आणि परिसरात मंगळवारी दुपारी सुमारे दीड तास मुसळधार पाऊस पडला. शहर आणि परिसरात सर्वत्र पाणीच पाणी झाले होते. ग्रामीण भागातही काही ठिकाणी पाऊस पडला. सकाळपासूनच हवेत उष्मा जाणवत असल्याने दिवसभरात मोठा पाऊस पडण्याची शक्यता व्यक्त केली जात होती. अपेक्षेप्रमाणे दुपारनंतर शहराला पावसाने झोडपून काढले.
वादळी वारा आणि विजांच्या कडकडाटासह पावसाच्या सरी कोसळल्या. त्यामुळे लक्ष्मी मार्केट, दत्त चौक, गाडवे चौक, शास्त्री चौक, स्टँड रोड, हिरा हॉटेल चौक, मिशन चौक, सिव्हिल चौक, भाऊराव पाटील चौक यासह शहरातील विविध गल्ली आणि चौकांमधील रस्त्यांवर पाणीपाणी झाले होते.