गावाला बेटाचे स्वरूप
प्रतिनिधी / चंदूर
हातकणंगले तालुक्यातील चंदूरच्या पंचगंगा नदीला आलेल्या महापुरामुळे गावास बेटा चे स्वरूप प्राप्त झाले आहे. संपूर्ण गावभागास पाण्याने वेढा दिल्याने गावातील ९०० हुन अधिक कुटुंबाचे स्थलांतर करण्यात आले आहे. सर्व नागरिकांचे गावातील कुमार विद्या मंदिर, कन्या विद्या मंदिर, संजीवन विद्या मंदिर आदी ठिकाणी सुरक्षितपणे स्थलांतर करण्यात आले आहे. त्याठिकाणी त्यांचे भोजनसह इतर आरोग्य सेवाही पुरवण्यात येत आहेत. तर काही नागरिक आपल्या नातेवाईकांच्या घरी स्थलांतर झाले आहेत. त्याचबरोबर गावातील जनावरांनाही सुरक्षित ठिकाणी हलविण्यात आले असून त्यांच्यासाठी चारा छावणी उभारण्यात आली आहे.
गावभागातील दलित वस्ती, कुंभार गल्ली, धनगर गल्ली, मिठारी गल्ली, एसटी स्टँड परिसर, आदी ठिकाणी नागरी वस्तीत पाणी शिरले आहे. नागरिकांच्या भोजनाची व्यवस्था पंचायत समिती सदस्य महेश पाटील यांच्या मार्गदर्शनाखाली सुरू असून यामध्ये सरपंच अनिता माने, प्रशांत माने, ग्रा.स.फिरोज शेख, संजय जिंदे, संदीप कांबळे, गुंडा पाटील, मंडळ आधिकारी जेरॉन गोंसालवीस, ग्रामसेवक बाळासाहेब कांबळे,पोपट कांबळे,तलाठी सीमा धोत्रे, पोलीस पाटील राहुल वाघमोडे, कोतवाल राजू पुजारी हे मदत करत आहेत तर आरोग्य सेवेसाठी संजय पाटील, कुंभार मॅडम यांची टीम कार्यरत आहे.