प्रतिनिधी/ पणजी
सुमूल दुग्ध उत्पादक संस्थेने अचानकपणे दूध संकलनाचा दर प्रतिलिटर 2.80 पैशांनी कमी केल्याने राज्यातील सुमारे 500 ते 600 शेतकरी अडचणीत आलेले आहेत. प्रत्यक्षात शेतकऱयांना सरकारची होणारी मदत विचारात घेता प्रतिलिटर 4 असा फटका बसलेला आहे.
सुमूल या दुग्ध उत्पादक संस्थेने गोव्यातील शेतकऱयांना अनेक आश्वासने देत व जादा दर देऊन दूध खरेदी करण्यात प्रारंभ केला. गोवा डेअरीच्या तुलनेत जादा दर मिळू लागल्याने शेतकरी मोठय़ा प्रमाणात सुमूलकडे आकर्षित झाले. त्याचा सुमूलला चांगला लाभ झाला व गोवा डेअरीकडील शेतकरी मोठय़ा प्रमाणात सुमूलकडे आकर्षित झाले. सध्या सुमूलकडे सुमारे 500 ते 600 शेतकरी आहेत. त्यांच्याकडून दररोज 20 हजार लिटर दूधाचे संकलन केले जाते.
शेतकऱयांना गोवा सरकारकडून 40 टक्के सबसिडी मिळते. सध्या सुमूलने प्रतिलिटर 2.80 रुपये दर कमी केल्याने गोवा सरकारकडून त्यावर मिळणारी एकूण सबसिडी विचारात घेता सर्वसाधारणपणे प्रतिलिटर 4 रुपयांचा थेट फरक पडतो. शेतकरीवर्ग सध्या फार अडचणीत सापडलेला आहे. अगोदरच वाहतुकदारांनी दरवाढ केलेली आहे. पशुखात्याचे दर त्यामुळे प्रतिकिलो 2 रुपये वाढलेले आहे. याचा शेतकऱयांना प्रतिलिटर दूध उत्पादनात 2 रुपयांचा थेट फटका बसलेला आहे.
राज्य सरकारने या प्रकरणात लक्ष घालून सुमुलला आदेश द्यावेत, अशी मागणी शेतकरीवर्गाने केली आहे.